കൊച്ചി: നിയമപരമായി ദത്തെടുക്കപ്പെട്ട കുട്ടി എല്ലാ അർത്ഥത്തിലും ദത്തെടുത്ത മാതാപിതാക്കളുടെ സ്വന്തം കുട്ടിയായി മാറുമെന്ന് കേരള ഹൈക്കോടതി വ്യക്തമാക്കി. ദത്തെടുക്കൽ നടപടികൾ പൂർത്തിയാകുന്നതോടെ ജനിച്ച കുടുംബവുമായുള്ള എല്ലാ നിയമപരമായ ബന്ധങ്ങളും വേർപെടുകയും കുട്ടി ദത്തെടുത്ത കുടുംബത്തിലെ പൂർണ്ണ അംഗമായി മാറുകയും ചെയ്യുമെന്ന് കോടതി നിരീക്ഷിച്ചു.
ദത്തെടുത്ത മാതാപിതാക്കളുടെ സ്വന്തം മക്കൾക്കുള്ള എല്ലാ അവകാശങ്ങളും ആനുകൂല്യങ്ങളും ദത്തെടുക്കപ്പെട്ട കുട്ടിക്കും ലഭിക്കാൻ അർഹതയുണ്ടെന്ന് കോടതി ചൂണ്ടിക്കാട്ടി. കുടുംബ ബന്ധങ്ങളിലും അവകാശങ്ങളിലും ദത്തെടുത്ത കുട്ടികളോട് യാതൊരുവിധ വിവേചനവും പാടില്ലെന്ന സുപ്രധാന സന്ദേശമാണ് ഹൈക്കോടതി വിധിയിലൂടെ നൽകിയിരിക്കുന്നത്.
