കണ്ണൂർ : റോഡരികിൽ നിർത്തിയിട്ടിരുന്ന സ്കൂട്ടറിലേക്ക് മിനിലോറി ഇടിച്ചുകയറി നാല് വയസ്സുകാരിക്ക് ദാരുണാന്ത്യം. ഇരിക്കൂർ സ്വദേശി പി.കെ. സാജിദ് - പാവന്നൂർകടവ് കുട്ടികുന്നുമ്മൽ ഹൗസിൽ എ.കെ. മൈമൂനത്ത് ദമ്പതികളുടെ മകൾ എ.കെ. തശ്രീഫയാണ് മരിച്ചത്. അപകടത്തിൽ ഗുരുതരമായി പരിക്കേറ്റ സാജിദും മൈമൂനത്തും കണ്ണൂരിലെ സ്വകാര്യ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്.
വ്യാഴാഴ്ച രാത്രി 8.20-ഓടെ പാവന്നൂർകടവ് പള്ളിക്ക് സമീപമായിരുന്നു നാടിനെ നടുക്കിയ അപകടം സംഭവിച്ചത്. റോഡരികിൽ നിർത്തിയിട്ടിരുന്ന സ്കൂട്ടറിലേക്ക് നിയന്ത്രണം വിട്ട മിനിലോറി ഇടിച്ചുകയറുകയായിരുന്നു.
പോസ്റ്റുമോർട്ടം നടപടികൾക്ക് ശേഷം പാവന്നൂർകടവ് മദ്രസയിൽ പൊതുദർശനത്തിന് വെച്ച മൃതദേഹം വൻ ജനവലിയുടെ സാന്നിധ്യത്തിൽ കബറടക്കി.
