തിരുവനന്തപുരം: സംസ്ഥാനത്ത് എസ്‌എസ്‌എല്‍സി, ഹയർ സെക്കൻ്ററി പരീക്ഷാ തിയ്യതികള്‍ പ്രഖ്യാപിച്ച്‌ വിദ്യാഭ്യാസ മന്ത്രി വി ശിവൻകുട്ടി.
2026 മാർച്ച് അഞ്ചിനാണ് എസ്‌എസ്‌എല്‍സി പരീക്ഷ ആരംഭിക്കുന്നത്. മാർച്ച് 30ന് അവസാനിക്കും. രാവിലെ 9.30നാണ് പരീക്ഷ ആരംഭിക്കുന്നത്.
ജനുവരി 12 മുതല്‍ 22 വരെയാണ് ഐടി മോഡല്‍ പരീക്ഷ നടത്തുക. ഫെബ്രുവരി രണ്ട് മുതല്‍ 12 വരെയാണ് ഐടി പരീക്ഷ. ഫെബ്രുവരി 16 മുതല്‍ 20വരെയാണ് മോഡല്‍ പരീക്ഷ. 2026 മേയ് എട്ടിനാണ് ഫലപ്രഖ്യാപനം.
2025 നവംബർ 12 മുതല്‍ 19 വരെയാണ് പരീക്ഷാ ഫീസ് അടയ്‌ക്കേണ്ടത്. നവംബർ 21 മുതല്‍ 26 വരെ പിഴയോടു കൂടി അപേക്ഷകള്‍ സ്വീകരിക്കും. 2026 ഏപ്രില്‍ ഏഴ് മുതല്‍ 25 വരെയായിരിക്കും മൂല്യ നിർണയം.
ഗള്‍ഫ് മേഖലയില്‍ ഏഴ് കേന്ദ്രങ്ങളും ലക്ഷദ്വീപില്‍ ഒമ്പത് കേന്ദ്രങ്ങളും ഉള്‍പ്പെടെ ആകെ 3,000ത്തിലധികം പരീക്ഷാ കേന്ദ്രങ്ങളുണ്ട്. 4,25,000 കുട്ടികളാണ് എസ്‌എസ്‌എല്‍സി പരീക്ഷ എഴുതുന്നത്.
ഹയർ സെക്കൻഡറി, വൊക്കേഷണല്‍ ഹയർ സെക്കൻഡറി ഒന്നാം വർഷ പൊതു പരീക്ഷകള്‍ 2026 മാർച്ച് അഞ്ച് മുതല്‍ മാർച്ച് 27 വരെ നടക്കും. രണ്ടാം വർഷ പൊതു പരീക്ഷകള്‍ മാർച്ച് ആറ് മുതല്‍ 28 വരെ നടക്കും.
ഒന്നാം വർഷ പരീക്ഷ ഉച്ചയ്‌ക്ക് 1.30നും രണ്ടാം വർഷ പരീക്ഷകള്‍ രാവിലെ 9.30നും ആരംഭിക്കും. വെള്ളിയാഴ്‌ച രാവിലെ 9.15ന് ആരംഭിച്ച്‌ ഉച്ചയ്‌ക്ക് 12 മണിക്ക് അവസാനിക്കും.
