ന്യൂഡൽഹി: രാജ്യത്ത് സൈബർ തട്ടിപ്പുകൾ ദിനംപ്രതി വർദ്ധിച്ചു വരുന്ന സാഹചര്യത്തിൽ പുതിയ തന്ത്രങ്ങളുമായി തട്ടിപ്പുകാർ രംഗത്ത്. ജനങ്ങളിൽ ഭയവും സമ്മർദ്ദവും സൃഷ്ടിച്ച് സാമ്പത്തിക തട്ടിപ്പ് നടത്തുന്ന പുതിയ രീതികളെക്കുറിച്ച് ജാഗ്രത പാലിക്കണമെന്ന് വിദഗ്ദ്ധർ മുന്നറിയിപ്പ് നൽകുന്നു.
ഓർഡർ ചെയ്യാത്ത ക്യാഷ് ഓൺ ഡെലിവറി (COD) ഉൽപ്പന്നങ്ങളുമായി എത്തി, ഓർഡർ റദ്ദാക്കുന്നതിനായി മൊബൈലിൽ വരുന്ന ഒ. ടി. പി. (OTP) പങ്കുവെക്കാൻ ആവശ്യപ്പെടുന്നതാണ് തട്ടിപ്പുകാരുടെ പുതിയ രീതി. ഉൽപ്പന്നം ഓർഡർ ചെയ്തിട്ടില്ലെന്ന് പറയുമ്പോൾ ശല്യം ഒഴിവാക്കാനായി ഒ. ടി. പി. നൽകുന്നതോടെയാണ് അക്കൗണ്ടുകളിൽ നിന്ന് പണം നഷ്ടപ്പെടുന്നത്. ബാങ്ക് അക്കൗണ്ട് വിവരങ്ങളും യു. പി. ഐ. പിൻ നമ്പറുകളും മാറ്റിയില്ലെങ്കിൽ വലിയ തുക നഷ്ടപ്പെടാൻ സാധ്യതയുണ്ട്.
സാങ്കേതികവിദ്യ നന്നായി അറിയാവുന്നവരും ഉന്നത വിദ്യാഭ്യാസം നേടിയവരും ഇത്തരം സാമ്പത്തിക സൈബർ തട്ടിപ്പുകൾക്ക് ഇരയാകുന്നുണ്ടെന്ന് ഐ. ഐ. ടി. മദ്രാസ് ഗവേഷകർ നടത്തിയ പഠനത്തിൽ വ്യക്തമാക്കുന്നു. വെപ്രാളവും ഭയവും മുതലെടുത്ത് ആളുകളുടെ ചിന്താശേഷിയെ മറികടന്നാണ് തട്ടിപ്പുകാർ ഇരകളെ വലയിലാക്കുന്നത്. പരിചയമില്ലാത്ത സന്ദേശങ്ങൾക്കും ഒ. ടി. പി. ആവശ്യങ്ങൾക്കും മറുപടി നൽകരുതെന്ന് അധികൃതർ നിർദ്ദേശിക്കുന്നു.
