തിരുവനന്തപുരം: സംസ്ഥാനത്തെ പ്രധാന കെ.എസ്.ആർ.ടി.സി. ബസ് ടെർമിനലുകളിൽ യാത്രക്കാരായ സ്ത്രീകൾക്കായി സാനിറ്ററി നാപ്കിൻ വെൻഡിങ് മെഷീനുകളും ഇൻസിനറേറ്ററുകളും സ്ഥാപിക്കുന്നു. വനിതാ ശിശുവികസന വകുപ്പിന്റെ 'വുമൺ ഓൺ ദി മൂവ് ആൻഡ് മെൻസ്ട്രുവൽ നീഡ്സ്' പദ്ധതിയുടെ ഭാഗമായി ആദ്യഘട്ടത്തിൽ 14 പ്രധാന ടെർമിനലുകളിലാണ് ഈ സൗകര്യം ഒരുക്കുന്നത്. ദീർഘദൂര യാത്രകളിൽ സ്ത്രീകൾ നേരിടുന്ന അടിയന്തര ആർത്തവ ശുചിത്വ ബുദ്ധിമുട്ടുകൾക്ക് ഇതോടെ പരിഹാരമാകും.
പദ്ധതിയുടെ സംസ്ഥാനതല ഉദ്ഘാടനം ചൊവ്വാഴ്ച വൈകുന്നേരം 4.30-ന് തമ്പാനൂർ കെ.എസ്.ആർ.ടി.സി. സെൻട്രൽ ബസ് ടെർമിനലിൽ വനിതാ ശിശുവികസന വകുപ്പ് മന്ത്രി ബിന്ദു കൃഷ്ണ നിർവ്വഹിക്കും.
ഗതാഗത വകുപ്പ് മന്ത്രി സി. പി. ജോൺ ചടങ്ങിൽ അധ്യക്ഷത വഹിക്കും. തിരുവനന്തപുരം കോർപ്പറേഷൻ മേയർ വി. വി. രാജേഷ് മുഖ്യാതിഥിയായി പങ്കെടുക്കും.
