തിരുവനന്തപുരം: പാലക്കാട് ഡിവിഷനിൽ ട്രാക്ക് അറ്റകുറ്റപ്പണികൾ നടക്കുന്നതിനാൽ സംസ്ഥാനത്തെ ട്രെയിൻ ഗതാഗതത്തിൽ നിയന്ത്രണം ഏർപ്പെടുത്തിയതായി ദക്ഷിണ റെയിൽവേ അറിയിച്ചു. സെപ്റ്റംബർ 17, 30 തീയതികളിലാണ് ട്രെയിനുകൾക്ക് ഭാഗിക റദ്ദാക്കലും സമയക്രമറ്റവും ഏർപ്പെടുത്തിയിരിക്കുന്നത്.
തിരുവനന്തപുരം-കണ്ണൂർ ജനശതാബ്ദി എക്സ്പ്രസ് ഉൾപ്പെടെയുള്ള ചില പ്രധാന സർവീസുകൾ ഈ ദിവസങ്ങളിൽ ഭാഗികമായി റദ്ദാക്കിയിട്ടുണ്ട്. കൂടാതെ മലബാർ എക്സ്പ്രസ്, രാജധാനി സൂപ്പർഫാസ്റ്റ് എക്സ്പ്രസ് തുടങ്ങിയ ട്രെയിനുകൾ വൈകി മാത്രമായിരിക്കും സർവീസ് നടത്തുകയെന്നും റെയിൽവേ വൃത്തങ്ങൾ അറിയിച്ചു. യാത്രക്കാർ യാത്ര തിരിക്കും മുൻപ് ട്രെയിൻ സമയവിവരങ്ങൾ ഉറപ്പുവരുത്തണമെന്ന് അധികൃതർ അഭ്യർത്ഥിച്ചു.
