ന്യൂഡൽഹി: ഡൽഹിയിൽ കെട്ടിടം തകർന്നുവീണുണ്ടായ വൻ ദുരന്തത്തിൽ മരണസംഖ്യ മൂന്നായി ഉയർന്നു. തകർന്നുവീണ കെട്ടിടത്തിന്റെ കോൺക്രീറ്റ് അവശിഷ്ടങ്ങൾക്കിടയിൽ കുടുങ്ങിയ വിദ്യാർത്ഥികൾ ഉൾപ്പെടെയുള്ളവർ പുറത്തേക്ക് ഫോൺ ചെയ്ത് സഹായമഭ്യർത്ഥിക്കുന്നതായി വിവരങ്ങൾ പുറത്തുവന്നു.
കെട്ടിടത്തിനുള്ളിൽ തങ്ങൾ കുടുങ്ങിക്കിടക്കുകയാണെന്നും അടിയന്തരമായി രക്ഷപ്പെടുത്തണമെന്നും ആവശ്യപ്പെട്ട് കുടുങ്ങിയവർ പോലീസിനും ബന്ധുക്കൾക്കും സന്ദേശമയക്കുകയും ഫോൺ വിളിക്കുകയും ചെയ്തതോടെയാണ് രക്ഷാപ്രവർത്തനം കൂടുതൽ ഊർജ്ജിതമാക്കിയത്. തകർന്ന ഭാഗങ്ങൾക്കിടയിലൂടെ ഫോൺ സിഗ്നലുകൾ കേന്ദ്രീകരിച്ചും തിരച്ചിൽ പുരോഗമിക്കുന്നുണ്ട്.
ദേശീയ ദുരന്തനിവാരണ സേനയും (NDRF) ഫയർഫോഴ്സും ചേർന്നാണ് അത്യാധുനിക സജ്ജീകരണങ്ങളോടെ രക്ഷാപ്രവർത്തനം നടത്തുന്നത്. കോൺക്രീറ്റ് പാളികൾ മുറിച്ചുമാറ്റി ഉള്ളിൽ കുടുങ്ങിയവരെ എത്രയും വേഗം പുറത്തെത്തിക്കാനുള്ള ശ്രമത്തിലാണ് ദൗത്യസംഘം. അപകടത്തിൽ പരിക്കേറ്റ നിരവധി പേരെ സമീപത്തെ ആശുപത്രികളിൽ പ്രവേശിപ്പിച്ചിട്ടുണ്ട്.
