തിരുവനന്തപുരം: സംസ്ഥാനത്ത് അടിയന്തര നിത്യോപയോഗ സാധനങ്ങളുടെ വിലക്കയറ്റം കാരണം സാധാരണക്കാരന്റെ ജീവിതം ദുസ്സഹമാകുന്നു. പച്ചക്കറി, മത്സ്യം എന്നിവയുടെ വില ഇരട്ടിയോളമായി ഉയർന്നതിന് പിന്നാലെ അരിവിലയും കുതിച്ചുയരുന്നത് ജനങ്ങൾക്ക് ഇരുട്ടടിയാവുകയാണ്.
കനത്ത മഴയും കാലാവസ്ഥാ വ്യതിയാനവും കാരണം അയൽസംസ്ഥാനങ്ങളിൽ നിന്നുള്ള പച്ചക്കറി വരവ് കുറഞ്ഞതാണ് പച്ചക്കറിവില കുത്തനെ ഉയരാൻ കാരണം. ട്രോളിംഗ് നിരോധനവും മോശം കാലാവസ്ഥയും കാരണം കടലിൽ പോകുന്ന ബോട്ടുകളുടെ എണ്ണം കുറഞ്ഞതോടെ മത്സ്യവിപണിയിലും കടുത്ത ക്ഷാമവും വിലക്കയറ്റവും അനുഭവപ്പെടുന്നുണ്ട്.
ഇതിനുപുറമേ, പൊതുവിപണിയിൽ പൊതുവെ ഉപയോഗിക്കുന്ന വിവിധയിനം അരികൾക്ക് കിലോയ്ക്ക് അഞ്ചു മുതൽ പത്ത് രൂപ വരെയാണ് ദിവസങ്ങൾക്കുള്ളിൽ വർദ്ധിച്ചത്. ഓണം അടക്കമുള്ള ഉത്സവ സീസൺ അടുത്തെത്തി നിൽക്കെ നിത്യോപയോഗ സാധനങ്ങളുടെ ഈ അനിയന്ത്രിതമായ വിലക്കയറ്റം ജനങ്ങളെ കടുത്ത പ്രതിസന്ധിയിലാക്കിയിട്ടുണ്ട്. മാർക്കറ്റുകളിൽ കാര്യക്ഷമമായ ഇടപെടൽ നടത്തി വിലക്കയറ്റം പിടിച്ചുനിർത്താൻ സർക്കാർ ഉടൻ നടപടി സ്വീകരിക്കണമെന്നാണ് പൊതുജനങ്ങളുടെ ആവശ്യം.
