പേരാവൂർ: കണ്ണൂർ പേരാവൂർ തൊണ്ടിയിൽ അതിശക്തമായ ഒഴുക്കിൽപ്പെട്ട് കാണാതായ വി.പി. ഹനീഫയ്ക്കായുള്ള തിരച്ചിൽ ദൗത്യം പുനരാരംഭിച്ചു. വെളിച്ചക്കുറവും കനത്ത മഴയും കാരണം നിർത്തിവെച്ച തിരച്ചിലാണ് ഇന്ന് രാവിലെയോടെ ഫയർഫോഴ്സും പോലീസും ചേർന്ന് വീണ്ടും ആരംഭിച്ചത്.
അഗ്നിരക്ഷാ സേന, പോലീസ്, സിവിൽ ഡിഫൻസ് എന്നിവർക്ക് പുറമെ പ്രാദേശിക സന്നദ്ധ പ്രവർത്തകരും പ്രദേശവാസികളും ഉൾപ്പെടെയുള്ള വലിയൊരു സംഘമാണ് തിരച്ചിലിൽ പങ്കാളികളാകുന്നത്. ഡൈവിങ് വിദഗ്ധരെ ഉപയോഗിച്ച് പുഴയുടെ പ്രധാന ഭാഗങ്ങളിൽ പരിശോധന നടക്കുന്നുണ്ട്.
കണ്ണൂർ മലയോര മേഖലയിൽ കനത്ത മഴ തുടരുന്നതിനാൽ പുഴയിൽ ശക്തമായ ഒഴുക്കും കലക്കുവെള്ളവും നിലനിൽക്കുന്നത് തിരച്ചിൽ ദൗത്യത്തിന് വലിയ വെല്ലുവിളി സൃഷ്ടിക്കുന്നുണ്ട്.
