തിരുവനന്തപുരം: സംസ്ഥാനത്ത് ശല്യക്കാരായ കാട്ടുപന്നികളെ വെടിവെച്ചു കൊല്ലാൻ തദ്ദേശസ്വയംഭരണ സ്ഥാപനങ്ങളുടെ കീഴിലുള്ള അംഗീകൃത ഷൂട്ടർമാർക്ക് നൽകിയിരുന്ന പ്രവർത്തനാനുമതിയുടെ പരിധി വിപുലീകരിച്ച് വനംവകുപ്പ് ഉത്തരവിറക്കി. പുതിയ ഭേദഗതി പ്രകാരം തദ്ദേശ സ്ഥാപനങ്ങളുടെ പട്ടികയിലുള്ള അംഗീകൃത ഷൂട്ടർമാർക്ക് സംസ്ഥാനത്ത് എവിടെ വേണമെങ്കിലും കാട്ടുപന്നികളെ വെടിവെക്കാൻ അനുമതിയുണ്ടാകും.
നിലവിൽ അതത് തദ്ദേശസ്വയംഭരണ സ്ഥാപനങ്ങളുടെ പരിധിക്കുള്ളിൽ മാത്രമായിരുന്നു ഷൂട്ടർമാർക്ക് കാട്ടുപന്നികളെ വെടിവെക്കാൻ അനുമതിയുണ്ടായിരുന്നത്. ഈ നിയന്ത്രണമാണ് പുതിയ ഉത്തരവിലൂടെ വനംവകുപ്പ് ഒഴിവാക്കിയത്.
* പ്രവർത്തനപരിധി ഭേദഗതി: തദ്ദേശ സ്വയംഭരണ സ്ഥാപനങ്ങളുടെ എംപാനൽ ചെയ്ത ഷൂട്ടർമാർക്ക് ഇനി ജില്ലാതിർത്തികളോ തദ്ദേശ ഭരണാതിർത്തികളോ ഇല്ലാതെ കേരളത്തിൽ എവിടെയും സേവനം നടത്താം.
* കാരണം: സംസ്ഥാനത്തെ 95 ശതമാനം പഞ്ചായത്തുകളിലും കാട്ടുപന്നികളുടെ രൂക്ഷമായ ശല്യമുണ്ടെന്നാണ് വനംവകുപ്പിന്റെ വിലയിരുത്തൽ. കൃഷിനാശവും ജനങ്ങൾക്കുള്ള ഭീഷണിയും കണക്കിലെടുത്താണ് തീരുമാനം.
* അധികാരപ്പെടുത്തൽ: വന്യജീവി സംരക്ഷണ നിയമപ്രകാരം തദ്ദേശ ഭരണാധികാരികളെ (പഞ്ചായത്ത് പ്രസിഡന്റ്, നഗരസഭാ ചെയർപേഴ്സൺ, മേയർ) ഓണററി വൈൽഡ് ലൈഫ് വാർഡന്മാരായും സെക്രട്ടറിമാരെ അധികാരപ്പെടുത്തിയ ഉദ്യോഗസ്ഥരായും നിയമിച്ചിട്ടുണ്ട്.
* മുന്നറിയിപ്പ്: നിയമാനുസൃതമായ നടപടിക്രമങ്ങൾ പാലിക്കാതെ കാട്ടുപന്നികളെ കൊല്ലുന്നതും അവയുടെ മാംസം ഉപയോഗിക്കുന്നതും ഗുരുതര കുറ്റകൃത്യമാണ്. നിയമലംഘനം നടത്തുന്നവർക്ക് 3 വർഷം വരെ തടവോ ഒരു ലക്ഷം രൂപ വരെ പിഴയോ അല്ലെങ്കിൽ രണ്ടുമോ ശിക്ഷ ലഭിക്കും.
