തിരുവനന്തപുരം: സംസ്ഥാനത്തെ കള്ളുഷാപ്പുകളിൽ വിതരണം ചെയ്യുന്ന ഭക്ഷ്യവസ്തുക്കൾക്ക് എക്സൈസ് വകുപ്പ് കർശന നിയന്ത്രണങ്ങൾ ഏർപ്പെടുത്തി. അനധികൃതമായി ഭക്ഷണം പാകം ചെയ്യുന്നതും വിൽക്കുന്നതും തടയുന്നതിന്റെ ഭാഗമായി ഷാപ്പുകൾക്ക് പ്രത്യേക ഭക്ഷ്യസുരക്ഷാ ലൈസൻസുകളും മറ്റ് അനുമതികളും നിർബന്ധമാക്കാനാണ് തീരുമാനം.
എക്സൈസ് വകുപ്പിന്റെ നേതൃത്വത്തിൽ നടത്തിയ പ്രത്യേക പരിശോധനകളുടെ പശ്ചാത്തലത്തിലാണ് ഈ പുതിയ നടപടി. കള്ളുഷാപ്പുകളിൽ വിൽക്കുന്ന വിവിധ തരം വിഭവങ്ങൾക്ക് വലിയ പ്രചാരമുണ്ടെങ്കിലും, പലയിടത്തും ആവശ്യമായ നിയമപരമായ അനുമതികളില്ലാതെയാണ് പാചകവും വിൽപ്പനയും നടക്കുന്നതെന്ന് കണ്ടെത്തിയിരുന്നു.
മാംസം, മത്സ്യം തുടങ്ങിയ വിഭവങ്ങളാണ്ഷാപ്പുകളിലെ പ്രധാന ആകർഷണം. ഇനിമുതൽ ഇവ തയ്യാറാക്കുന്നതിനും സൂക്ഷിക്കുന്നതിനും വിൽക്കുന്നതിനും കൃത്യമായ ഭക്ഷ്യസുരക്ഷാ മാനദണ്ഡങ്ങൾ പാലിക്കേണ്ടതുണ്ട്. നിയമപരമായി ആവശ്യമായ ലൈസൻസുകളും അനുമതികളും നേടിയ കടകൾക്ക് തടസ്സമില്ലാതെ ഭക്ഷണം വിൽക്കുന്നത് തുടരാം. അതേസമയം, മാനദണ്ഡങ്ങൾ പാലിക്കാത്ത സ്ഥാപനങ്ങൾക്കെതിരെ ശക്തമായ നടപടികൾ ഉണ്ടാകും.
