ഫേസ്ബുക്കിൽ റീൽ കണ്ട് ഡ്രോൺ ക്യാമറ ഓർഡർ ചെയ്ത പാലക്കാട് ഒറ്റപ്പാലം പനമണ്ണ സ്വദേശിയായ യുവാവിന് കിട്ടിയത് രണ്ട് കുപ്പിവെള്ളം. ഇൻ്റോ ഗാഡ്ജെറ്റ്സ് എന്ന ഫേസ്ബുക്ക് പേജിൽ നിന്നാണ് യുവാവ് ഡ്രോൺ ഓർഡർ ചെയ്തത്. ഇതുവഴി യുവാവിന് 2200 രൂപ നഷ്ടമായി.
മൂന്ന് ദിവസത്തിനുള്ളിൽ ഡെലിവറി ചെയ്യാമെന്ന് വാഗ്ദാനം ചെയ്ത് ആദ്യം കൊറിയർ ചാർജായി 200 രൂപയും പിന്നീട് പാർസൽ ലഭിച്ച ശേഷം ബാക്കി 2000 രൂപയും യുവാവ് നൽകുകയായിരുന്നു. എന്നാൽ പാർസൽ തുറന്നു നോക്കിയപ്പോഴാണ് താൻ കബളിപ്പിക്കപ്പെട്ട വിവരം മനസ്സിലായത്. സംഭവത്തിൽ യുവാവ് ഒറ്റപ്പാലം പൊലീസിൽ പരാതി നൽകി. ഇത്തരം ഓൺലൈൻ തട്ടിപ്പുകൾക്കെതിരെ ജാഗ്രത പാലിക്കണമെന്നും വെരിഫൈഡ് അക്കൗണ്ടുകളിൽ നിന്ന് മാത്രം സാധനങ്ങൾ ഓർഡർ ചെയ്യണമെന്നും പൊലീസ് മുന്നറിയിപ്പ് നൽകി.
