ടെക്സാസ്: മുൻ ചാമ്പ്യന്മാരായ ഫ്രാൻസ് ഫിഫ ലോകകപ്പിന്റെ ക്വാർട്ടർ ഫൈനലിൽ പ്രവേശിച്ചു. പ്രീ ക്വാർട്ടർ പോരാട്ടത്തിൽ പരാഗ്വെയെ എതിരില്ലാത്ത ഒരു ഗോളിന് തകർത്താണ് ഫ്രഞ്ചുപടയുടെ മുന്നേറ്റം. ക്യാപ്റ്റൻ കിലിയൻ എംബാപ്പെ പെനാൽറ്റിയിലൂടെ നേടിയ ഗോളാണ് ഫ്രാൻസിന് വിജയമൊരുക്കിയത്. ക്വാർട്ടർ ഫൈനലിൽ ആഫ്രിക്കൻ കരുത്തരായ മൊറോക്കോയാണ് ഫ്രാൻസിന്റെ എതിരാളികൾ.
മത്സരത്തിന്റെ ആദ്യ മിനിറ്റുകളിൽ ഇരുടീമുകൾക്കും കാര്യമായ മുന്നേറ്റങ്ങൾ നടത്താനായില്ല. പതുക്കെ കളം പിടിച്ച ഫ്രാൻസ് പന്ത് കൂടുതൽ സമയം കൈവശം വെച്ച് അവസരങ്ങൾ സൃഷ്ടിച്ചെങ്കിലും പരാഗ്വെ പ്രതിരോധം ശക്തമായി നിലകൊണ്ടു. കൗണ്ടർ അറ്റാക്കുകളിലൂടെ ഫ്രഞ്ച് ബോക്സിൽ അപകടം വിതയ്ക്കാനും പരാഗ്വെയ്ക്ക് സാധിച്ചു. 28-ാം മിനിറ്റിൽ പരാഗ്വെയുടെ ഡീഗോ ഗോമസ് ഗോളിനടുത്തെത്തിയെങ്കിലും ലക്ഷ്യം കാണാനായില്ല. ആദ്യപകുതിയുടെ അവസാന മിനിറ്റുകളിൽ മത്സരം പലപ്പോഴും പരുക്കനായി മാറി. എംബാപ്പെയെ പരാഗ്വെ താരങ്ങൾ നിരന്തരം ഫൗൾ ചെയ്തത് കളിക്കളത്തിൽ തർക്കങ്ങൾക്കും കൈയാങ്കളികൾക്കും കാരണമായി.
രണ്ടാം പകുതിയിൽ ഫ്രാൻസ് ആക്രമണം ശക്തമാക്കിയെങ്കിലും പരാഗ്വെ ഗോൾ കീപ്പർ ഒർലാൻഡോ ഗില്ലിന്റെ മികച്ച സേവുകൾ ഫ്രാൻസിന് തടസ്സമായി. എന്നാൽ 70-ാം മിനിറ്റിൽ മത്സരം ഫ്രാൻസിന് അനുകൂലമായി മാറി. എംബാപ്പെയെ ബോക്സിൽ വീഴ്ത്തിയതിന് വാർ (VAR) പരിശോധനയ്ക്ക് ശേഷം റഫറി പെനാൽറ്റി അനുവദിച്ചു. കിക്ക് എടുത്ത എംബാപ്പെ പന്ത് കൃത്യമായി വലയിലെത്തിച്ചു. ഈ ഗോളിന് മറുപടി നൽകാൻ പിന്നീട് പരാഗ്വെയ്ക്ക് സാധിച്ചില്ല
