കേന്ദ്ര സർക്കാരിന്റെ പിഎം ശ്രീ (PM-SHRI) സ്കൂൾ നവീകരണ പദ്ധതി സംസ്ഥാനത്ത് ഉപാധികളോടെ നടപ്പാക്കാൻ തീരുമാനം. മുൻ സർക്കാർ കേന്ദ്രവുമായി കരാറിൽ ഒപ്പുവെക്കുകയും ഫണ്ട് കൈപ്പറ്റുകയും ചെയ്ത സാഹചര്യത്തിൽ, നിലവിലെ കരാർ പാലിക്കാൻ സംസ്ഥാനം നിയമപരമായി ബാധ്യസ്ഥരാണെന്ന് കെ മുരളീധരൻ വ്യക്തമാക്കി. പദ്ധതിയിൽ നിന്ന് പൂർണ്ണമായി പിന്മാറുന്നത് പ്രായോഗികമല്ലെന്നും അദ്ദേഹം കൂട്ടിച്ചേർത്തു.
സംസ്ഥാനത്തിന്റെ വിദ്യാഭ്യാസ അവകാശങ്ങളും പാഠ്യപദ്ധതി തയ്യാറാക്കാനുള്ള സ്വയംഭരണാധികാരവും പൂർണ്ണമായി സംരക്ഷിച്ചുകൊണ്ട് മാത്രമായിരിക്കും പദ്ധതിയുമായി മുന്നോട്ട് പോവുക. സ്കൂളുകൾ തിരഞ്ഞെടുക്കുന്നതിലും പാഠ്യപദ്ധതി നിശ്ചയിക്കുന്നതിലും കേന്ദ്ര ഇടപെടൽ അനുവദിക്കില്ലെന്ന ശക്തമായ നിലപാടിലാണ് സംസ്ഥാനം. ഇക്കാര്യത്തിൽ വ്യക്തമായ ഉപാധികൾ മുന്നോട്ട് വെക്കാൻ മന്ത്രിസഭാ ഉപസമിതിയെ ചുമതലപ്പെടുത്തിയിട്ടുണ്ട്.
പദ്ധതി നടപ്പാക്കുന്നത് സംബന്ധിച്ച് സംസ്ഥാന സർക്കാർ സ്വീകരിക്കുന്ന അന്തിമ തീരുമാനം ഔദ്യോഗികമായി കേന്ദ്ര സർക്കാരിനെ അറിയിക്കും. സംസ്ഥാനത്തിന്റെ താല്പര്യങ്ങൾ ഹനിക്കപ്പെടാത്ത രീതിയിൽ പദ്ധതി നടപ്പിലാക്കാനുള്ള ഉപാധികളായിരിക്കും കേന്ദ്രത്തിന് സമർപ്പിക്കുന്ന കത്തിൽ ഉൾപ്പെടുത്തുക.
