കോഴിക്കോട്: വിലങ്ങാട് വനത്തിനുള്ളിൽ കുടുങ്ങിപ്പോയ മൂന്ന് യുവാക്കളെയും വനംവകുപ്പ് സംഘം സുരക്ഷിതമായി കണ്ടെത്തി. വനമേഖലയിലെ വാളുക്ക് അത്തായ കൊത്ത് എന്ന സ്ഥലത്ത് നിന്നാണ് ശനിയാഴ്ചയോടെ ഇവരെ വനംവകുപ്പിന്റെ തിരച്ചിൽ സംഘം കണ്ടെത്തിയത്. തുടർന്ന് ഇവരെ കാടിന് പുറത്തെത്തിച്ചു. വടകര ചോറോട് സ്വദേശികളായ യുവാക്കളാണ് വനത്തിൽ അകപ്പെട്ടിരുന്നത്. വെള്ളിയാഴ്ച വൈകിട്ട് നാലരയോടെയാണ് ഇവർ കാട്ടിലേക്ക് പോയതും പിന്നീട് വഴിതെറ്റി കുടുങ്ങിയതും.
തിരച്ചിലിനായി ഇറങ്ങിയത് 12 വനംവകുപ്പ് സംഘങ്ങൾ
യുവാക്കൾ വനത്തിനുള്ളിൽ പ്രവേശിച്ചത് എന്തിനാണെന്ന കാര്യത്തിൽ പൂർണ്ണമായ വ്യക്തത വന്നിട്ടില്ലെങ്കിലും, കൗതുകത്തിന് വേണ്ടി കാട്ടിൽ കയറിയതാകാമെന്നാണ് പ്രാഥമിക നിഗമനം. രണ്ട് ബൈക്കുകളിലായിട്ടാണ് ഇവർ വിലങ്ങാട് വനമേഖലയ്ക്ക് സമീപം എത്തിയത്. യുവാക്കൾ കാട്ടിൽ കുടുങ്ങിയ വിവരം നാട്ടുകാരാണ് ആദ്യം തിരിച്ചറിഞ്ഞത്. തുടർന്ന് നടത്തിയ പരിശോധനയിൽ ഇവർ സഞ്ചരിച്ച ബൈക്കുകളും ഉപയോഗിച്ചിരുന്ന ലൈറ്റും കാടിന് സമീപം കണ്ടെത്തുകയായിരുന്നു. വിവരമറിഞ്ഞ് 12 വനംവകുപ്പ് സംഘങ്ങളാണ് കാട്ടിൽ ഒരേസമയം തിരച്ചിലിനായി ഇറങ്ങിയത്.
നിയമനടപടികളിലേക്ക് വനംവകുപ്പ്
കാട്ടിൽ നിന്ന് പുറത്തെത്തിച്ച യുവാക്കളെ വനംവകുപ്പ് അധികൃതർ വിശദമായി ചോദ്യം ചെയ്യും. അനുമതിയില്ലാതെ സംരക്ഷിത വനമേഖലയിൽ അതിക്രമിച്ചു കയറിയതിനും സ്വന്തം ജീവനും വന്യജീവികൾക്കും ഭീഷണിയാകും വിധം പ്രവർത്തിച്ചതിനും ഇവർക്കെതിരെ ശക്തമായ നിയമനടപടികൾ സ്വീകരിക്കുമെന്നും കേസെടുക്കുമെന്നും വനംവകുപ്പ് അധികൃതർ വ്യക്തമാക്കിയിട്ടുണ്ട്.
