പാലക്കാട്: വീടിനുള്ളിൽ വ്യായാമത്തിനായി കെട്ടിയ കയറിൽ അബദ്ധത്തിൽ കുരുങ്ങി 11 വയസ്സുകാരി മരിച്ചു. കൂറ്റനാട് പുളിക്കൽ വീട്ടിൽ അലിമോന്റെ മകൾ ആയിഷ ഹിഫയാണ് (11) മരിച്ചത്. വട്ടേനാട് ജി.വി.എച്ച്.എസ്.എസ്സിലെ ആറാം ക്ലാസ് വിദ്യാർത്ഥിനിയാണ് ഹിഫ.
ഉയരക്കുറവ് പരിഹരിക്കുന്നതിനായി വീടിന്റെ അടുക്കളയിൽ കെട്ടിയിരുന്ന പ്ലാസ്റ്റിക് കയറിൽ കുരുങ്ങിയാണ് അപകടമുണ്ടായത്. കുട്ടി അബദ്ധത്തിൽ ഇതിൽ കുരുങ്ങുകയായിരുന്നുവെന്ന് വീട്ടുകാർ പോലീസിന് മൊഴി നൽകി. സംഭവസമയത്ത് ആയിഷയുടെ മാതാവും സഹോദരിയും പുറത്തുപോയിരിക്കുകയായിരുന്നു. വീട്ടിലുണ്ടായിരുന്ന മുത്തശ്ശിമാർ കുട്ടിയെ കാണാതായതിനെ തുടർന്ന് നടത്തിയ അന്വേഷണത്തിലാണ് അടുക്കളയിൽ കയറിൽ കുരുങ്ങിയ നിലയിൽ ഹിഫയെ കണ്ടെത്തിയത്.
ഉടൻ തന്നെ എടപ്പാളിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. നിലവിൽ മൃതദേഹം ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. തൃത്താല പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി. അസ്വാഭാവിക മരണത്തിന് കേസെടുത്ത പോലീസ് കൂടുതൽ അന്വേഷണം നടത്തിവരികയാണ്.
