തിരുവനന്തപുരം: പുതുവത്സരാഘോഷങ്ങളുടെ പശ്ചാത്തലത്തിൽ സംസ്ഥാനത്തെ ബാറുകളുടെ പ്രവർത്തന സമയം നീട്ടി സർക്കാർ ഉത്തരവ്. നാളെ (ഡിസംബർ 31) രാത്രി 12 മണി വരെ ബാറുകൾക്ക് തുറന്നു പ്രവർത്തിക്കാൻ അനുമതി നൽകി. നിലവിൽ രാവിലെ 11 മുതൽ രാത്രി 11 വരെയാണ് ബാറുകളുടെ പ്രവർത്തന സമയം. ഇതാണ് ഒരു മണിക്കൂർ കൂടി വർദ്ധിപ്പിച്ചത്.
പുതുവത്സരത്തോടനുബന്ധിച്ച് വിവിധ ബാർ ഹോട്ടലുകളിൽ ആഘോഷ പരിപാടികൾ സംഘടിപ്പിച്ചിട്ടുള്ളതിനാലും വിനോദസഞ്ചാരികളുടെ തിരക്ക് പരിഗണിച്ചും സമയം നീട്ടിനൽകണമെന്ന് ഉടമകൾ സർക്കാരിനോട് ആവശ്യപ്പെട്ടിരുന്നു. ഈ ആവശ്യം പരിഗണിച്ചാണ് നടപടി.
അതേസമയം, പ്രവർത്തന സമയം നീട്ടി നൽകിയ സാഹചര്യത്തിൽ ക്രമസമാധാന പ്രശ്നങ്ങൾ ഉണ്ടാകാതിരിക്കാൻ കർശന ജാഗ്രത പാലിക്കണമെന്ന് ഉത്തരവിൽ നിർദ്ദേശമുണ്ട്. ആഘോഷങ്ങൾക്കിടയിൽ അനിഷ്ട സംഭവങ്ങളോ ക്രമസമാധാന ലംഘനമോ ഉണ്ടായാൽ ബാർ ഹോട്ടലുകൾ ഉടൻ പൂട്ടിക്കുമെന്നും സർക്കാർ മുന്നറിയിപ്പ് നൽകി.
