തിരുവനന്തപുരം: വിദ്യാഭ്യാസ രംഗത്ത് കേരളത്തിന് വീണ്ടും ദേശീയ അംഗീകാരം. സംസ്ഥാനത്തെ പൊതുവിദ്യാഭ്യാസ വകുപ്പിന്റെ സാങ്കേതിക വിഭാഗമായ കേരള ഇൻഫ്രാസ്ട്രക്ച്ചർ ആൻഡ് ടെക്നോളജി ഫോർ എഡ്യൂക്കേഷന് (കൈറ്റ്) 'എഡ്യൂക്കേഷൻ ടെക്നോളജി ട്രാൻസ്ഫോർമേഷൻ അവാർഡ്' ലഭിച്ചു.
നിർമിത ബുദ്ധി പ്ലാറ്റ്ഫോമിന് അംഗീകാരം:
കേരളത്തിലെ സ്കൂളുകൾക്കായി കൈറ്റ് സജ്ജമാക്കിയ നിർമിത ബുദ്ധി (Artificial Intelligence) അധിഷ്ഠിത ലേണിംഗ് പ്ലാറ്റ്ഫോമായ 'സമഗ്ര പ്ലസ് എ ഐ' ക്കാണ് ഈ ദേശീയ അംഗീകാരം. ഒഡീഷയിലെ ഭുവനേശ്വറിൽ നടന്ന 19-ാമത് ഡിജിറ്റൽ ട്രാൻസ്ഫോർമേഷൻ കോൺക്ലേവിലാണ് പുരസ്കാരം പ്രഖ്യാപിച്ചത്. ഡിസംബർ 5-ന് നടന്ന ചടങ്ങിൽ പുരസ്കാര വിവരം സംഘാടകർ കൈറ്റ് സി.ഇ.ഒ കെ. അൻവർ സാദത്തിനെ അറിയിച്ചു.
'സമഗ്ര പ്ലസ് എഐ'യുടെ പ്രത്യേകതകൾ:
ഓരോ കുട്ടിക്കും അവരുടെ പഠനനിലവാരത്തിനനുസരിച്ച് പഠനം ക്രമീകരിക്കുന്നതിന് സഹായിക്കുന്ന എ.ഐ പ്ലാറ്റ്ഫോമാണ് 'സമഗ്ര പ്ലസ്'. ഇതിൽ ചാറ്റ് ബോട്ട് സംവിധാനം, ക്വിസ്, ഇംഗ്ലീഷ് ഭാഷാ പഠനവുമായി ബന്ധപ്പെട്ട വിവിധ ഗെയിമുകൾ, സ്പീച്ച് അസിസ്റ്റന്റ്, വിലയിരുത്തൽ സംവിധാനങ്ങൾ തുടങ്ങിയ മൊഡ്യൂളുകൾ ഉൾപ്പെടുത്തിയിട്ടുണ്ട്.
നിർമിതബുദ്ധിയുടെ അൽഗോരിതം പക്ഷപാത ആശങ്കകൾ ഇല്ലാതെ, പൂർണമായും കരിക്കുലം ചട്ടക്കൂടിനകത്തു നിന്നുകൊണ്ടാണ് കൈറ്റ് 'സമഗ്ര പ്ലസ് എ ഐ' പ്ലാറ്റ്ഫോം വികസിപ്പിച്ചത്. ഇത് സംസ്ഥാനത്തെ വിദ്യാഭ്യാസ രംഗത്തെ സാങ്കേതിക വിദ്യയുടെ മികച്ച വിനിയോഗത്തിനുള്ള അംഗീകാരമായി കണക്കാക്കുന്നു.
