കണ്ണൂർ : ജില്ലാ എൻഫോഴ്‌സ്‌മെന്റ് സ്ക്വാഡ് ചിറക്കല്‍ ഗ്രാമപഞ്ചായത്ത് പരിധിയിലെ പുതിയതെരു ടൗണിലെ കടകളില്‍ വിതരണം ചെയ്യുവാനായി വാഹനത്തില്‍ കൊണ്ട് വന്ന ഒരു ക്വിന്റല്‍ നിരോധിത ഒറ്റ തവണ ഉപയോഗ പ്ലാസ്റ്റിക് ക്യാരി ബാഗുകളും പേപ്പർ കപ്പുകളും പിടികൂടി.
പുതിയതെരു ടൗണിലെ കടകളില്‍ മസാലകള്‍ എത്തിച്ചു വില്‍പ്പന്ന നടത്തുന്ന വാഹനത്തില്‍ നിരോധിത പ്ലാസ്റ്റിക് ക്യാരി ബാഗുകള്‍ സപ്ലൈ ചെയ്യുന്നതായി സംശയം തോന്നിയതിനെ തുടർന്നാണ് പരിശോധന നടത്തിയത്.
പരിശോധനയില്‍ വാഹനത്തില്‍ നിന്ന് നിരോധിത പ്ലാസ്റ്റിക് ക്യാരി ബാഗുകളും പേപ്പർ കപ്പുകളും കണ്ടെത്തി. റോഷൻ എന്നവരുടെ ഉടമസ്ഥതയിലുള്ള വാഹനത്തിലാണ് നിരോധിത പ്ലാസ്റ്റിക് ഉല്‍പ്പന്നങ്ങള്‍ കടകളില്‍ സപ്ലൈ ചെയ്തു വന്നിരുന്നത്.
പുതിയ തെരു, മയ്യില്‍, കമ്പില്‍ ഭാഗങ്ങളിലെ കടകളിലേയ്ക്ക് വിതരണം ചെയ്യുന്നതിന് വേണ്ടി ഓരോ ചാക്കുകളിലും കടകളുടെ പേര് പുറത്ത് എഴുതിയ ശേഷം നിരോധിത ക്യാരി ബാഗുകളും മറ്റു മസാല പാക്കറ്റുകളും വെച്ചിരിക്കുന്നതായി കണ്ടെത്തി.
തുടർന്നു വാഹനം വിശദമായ പരിശോധനക്കായി ചിറക്കല്‍ ഗ്രാമപഞ്ചായത്ത് കാര്യാലയത്തിലേക്ക് കൊണ്ട് പോവുകയും നിരോധിത സാധനങ്ങള്‍ പിടിച്ചെടുക്കുകയും ഉടമയായ റോഷനെന്നയാളെ സംഭവ സ്ഥലത്ത് വിളിച്ചു വരുത്തി കൈയ്യോടെ 10000 രൂപ പിഴ അടപ്പിക്കുകയും ചെയ്തു.
പിടിച്ചെടുത്ത നിരോധിത പ്ലാസ്റ്റിക് ഉല്‍പന്നങ്ങള്‍ സംസ്കരിക്കുന്നതിനായി പഞ്ചായത്തിന് കൈമാറുകയും ചെയ്തു.
പരിശോധനയില്‍ ജില്ലാ എൻഫോഴ്‌സ്‌മെന്റ് സ്ക്വാഡ് ലീഡർ അഷ്‌റഫ്‌ പി പി, സ്ക്വാഡ് അംഗങ്ങാളായ അലൻ ബേബി, ദിബില്‍ സി കെ, ചിറക്കല്‍ ഗ്രാമപഞ്ചായത്ത് ഹെല്‍ത്ത്‌ ഇൻസ്‌പെക്ടർ ജിഷാൻ എം വി എന്നവർ പങ്കെടുത്തു
