കണ്ണൂർ: കണ്ണപുരത്ത് ബിജെപി റോഡരികില്‍ സ്ഥാപിച്ച കൊടിമരം വീണ്ടും കണ്ണപുരം പൊലിസ് നീക്കം ചെയ്തു. ബുധനാഴ്ച രാവിലെ ഒൻപതു മണിയോടെയാണ് കൊടിമരം നീക്കിയത്.
മറ്റ് രാഷ്ട്രീയ പാർട്ടികളുടെ കൊടിതോരണങ്ങളും അഴിച്ച്‌ മാറ്റി ബി ജെ പി സ്ഥാപക ദിനത്തില്‍ കണ്ണപുരം ചൈനാക്ലേ റോഡിന് സമീപം ബി ജെ പി സ്ഥാപിച്ച കൊടിയും കൊടിമരവും കണ്ണപുരം പോലീസ് അഴിച്ച്‌ മാറ്റിയത് ഏറെ വിവാദങ്ങള്‍ക്ക് വഴി വെച്ചിരുന്നു.
ഇതേ തുടർന്ന് കണ്ണപുരം പോലീസ് സ്റ്റേഷനിലേക്ക് ബി.ജെ.പിമാർച്ച്‌ നടത്തുകയും ചെയ്തിരുന്നു. വീണ്ടും ചൈനാ ക്ലേ റോഡില്‍ കൊടി പുനസ്ഥാപിക്കുകയും ചെയ്തിരുന്നു.
ഈ കൊടിമരമാണ് ബുധനാഴ്ച വീണ്ടും പോലീസ് അഴിച്ച്‌ മാറ്റിയത്. സി പി എം ന്റെയും മറ്റ് സംഘടനകളുടെയും കൊടി തോരണങ്ങളും , ബോർഡുകളും പോലീസ് നീക്കം ചെയ്തു. സംഘർഷ സാധ്യത കണക്കിലെടുത്ത് വൻ പോലീസ് സന്നാഹം സ്ഥലത്ത് ക്യാമ്പ് ചെയ്യുന്നുണ്ട്.
എന്നാല്‍ പോലീസ് നിലപാട് ഏകപക്ഷിയമാണെന്നും പ്രദേശത്തെ സി പി എം കൊടിമരം മുറിച്ച്‌ മാറ്റാൻ പോലീസ് തയ്യാറായിട്ടില്ലെന്നും ബി.ജെ.പി പ്രവർത്തകർ പറഞ്ഞു. പ്രദേശത്ത് പോലീസ് ക്യാമ്പ് ചെയ്ത് വരികയാണ്'
