തിരുവനന്തപുരം: ബഹിരാകാശ ശാസ്ത്ര-സാങ്കേതിക വിദ്യയിലും പ്രായോഗിക തലങ്ങളിലും അറിവ് പകരുക എന്ന ലക്ഷ്യത്തോടെ മെയ് 19മുതൽ ഒൻപതാം ക്ലാസ് വിദ്യാർഥികൾക്ക് ISROയുടെ ‘യുവിക’ യങ് സയൻറിസ്റ്റ് പരിശീലന പരിപാടി ആരംഭിക്കും.
പരിശീലനത്തിനുള്ള രജിസ്‌ട്രേഷൻ മാർച്ച്‌ 23ന് അവസാനിക്കും.
മെയ് 19 മുതൽ 30 വരെയാണ് പരിശീലനം. തെരഞ്ഞെടുക്കപ്പെടുന്നവരുടെ ലിസ്റ്റ് ഏപ്രിൽ ഏഴിന് പ്രസിദ്ധപ്പെടുത്തും. യുവിക പ്രോഗ്രാമിന്റെ വിശദാംശങ്ങൾ https:// jigyasa.iirs.gov.in/yuvika ൽ ലഭ്യമാണ്. വിക്രംസാരാഭായ് സ്പേസ് സെന്റർ തിരുവനന്തപുരം, സതീഷ്ധവാൻ സ്പേസ് സെന്റർ ശ്രീഹരിക്കോട്ട, യു.ആർ. റാവു സാറ്റലൈറ്റ് സെന്റർ ബംഗളൂരു, സ്പേസ് ആപ്ലിക്കേഷൻസ് സെന്റർ അഹ്മദാബാദ്, നാഷനൽ റിമോട്ട് സെൻസിങ് സെന്റർ ഹൈദരാബാദ്, നോർത്ത് ഈസ്റ്റേൺ സ്പേസ് ആപ്ലിക്കേഷൻസ് സെന്റർ ഷില്ലോങ്, ഇന്ത്യൻ ഇൻസ്റ്റിറ്റ്യൂട്ട് ഓഫ് റിമോട്ട് സെൻസിങ്, ഡറാഡൂൺ എന്നിവിടങ്ങളിലാണ് പഠന പരിശീശലന ക്ലാസുകൾ നടക്കുക.
ഇ-മെയിലിൽ ഐ.എസ്.ആർ.ഒയുടെ അറിയിപ്പ് ലഭിക്കുന്നവർ മേയ് 18ന് ബന്ധപ്പെട്ട സെന്ററിൽ റിപ്പോർട്ട് ചെയ്യണം. എട്ടാം ക്ലാസ് മാർക്ക്, ഓൺലൈൻ ക്വിസിലെ പ്രകടനം, കഴിഞ്ഞ മൂന്നു വർഷങ്ങളിലെ ശാസ്ത്രമേള പങ്കാളിത്തം, ഒളിമ്പ്യാർഡ് റാങ്ക്, സ്പോർട്സ് മത്സരങ്ങളിലെ വിജയം, സ്കൗട്ട് ആൻഡ് ഗൈഡ്/ എൻ.സി.സി/എൻ.എസ്.എസ് അംഗത്വം, ഗ്രാമീണ സ്കൂൾ വിദ്യാഭ്യാസം എന്നിവ പരിഗണിച്ചാണ് തെരഞ്ഞെടുപ്പ്.
പ്രോഗ്രാമിൽ പങ്കെടുക്കുന്നവരുടെ യാത്രാക്കൂലി (ട്രെയിൻ/വോൾവോ ഫെയർ) കോഴ്സ് മെറ്റീരിയൽസ്, താമസം മുതലായ മുഴുവൻ ചെലവുകളും ഐ.എസ്.ആർ.ഒ വഹിക്കും. കൂടുതൽ വിവരങ്ങൾക്ക് yuvika@isro.gov.in എന്ന ഇ-മെയിലിൽ ബന്ധപ്പെടാൻ അവസരമുണ്ട്.
