കണ്ണൂർ: ഗള്‍ഫില്‍ പ്രവാസികളെ ഭീഷണിപ്പെടുത്തി കോടികള്‍ തട്ടിയെടുത്ത യുവാവിനെ കണ്ണൂർ പോലീസിൻ്റെ സഹായത്തോടെ ഇൻ്റർപോള്‍ സംഘം പിടികൂടി.
ചെറുകുന്ന് മുണ്ടപ്രം കമ്മാരംക്കുന്നിലെ വളപ്പില്‍ പീടികയില്‍ സവാദിനെ (31)യാണ് കണ്ണൂർ ജില്ലാ പോലീസ് മേധാവിയുടെ സഹായത്തോടെ അന്താരാഷ്ട്ര കുറ്റാന്വേഷണ സംഘമായ ഇൻ്റർപോള്‍ പിടികൂടിയത്.
ഇന്നലെ വൈകുന്നേരം 6 മണിയോടെ പഴയങ്ങാടി പയ്യന്നൂർ അതിർത്തിയായ പാലക്കോട് വെച്ചാണ് യുവാവിനെ പിടി കൂടിയത്. ദുബായിയില്‍ പ്രവാസികളെ ഇ.ഡി ചമഞ്ഞ് ഭീഷണിപ്പെടുത്തി അഞ്ച് കോടി എണ്‍പത് ലക്ഷം രൂപയോളമാണ് സംഘം തട്ടിയെടുത്തത്.
നാട്ടിലേക്ക് കടന്ന് ഒളിവില്‍ കഴിയുന്നതിനിടെയാണ് പ്രതി പിടിയിലായത്. ഒളിവില്‍ കഴിയുന്ന മുഖ്യ പ്രതിയായ കണ്ണൂർ സ്വദേശിക്കു വേണ്ടി അന്വേഷണ സംഘം തെരച്ചില്‍ ഊർജ്ജിതമാക്കി.
