കണ്ണൂർ: സിറ്റി പൊലീസ് കമ്മീഷണറായി നിധിൻ രാജ് ചുമതലയേറ്റു. കമ്മീഷണറേറ്റ് ആസ്ഥാനത്ത് അഡീഷണൽ എസ്.പി കെ വി വേണു ഗോപാൽ, എ.സി.പിമാരായ ടി.കെ.രത്‌ന കുമാർ, എ.വി.ജോൺ എന്നിവർ ചേർന്ന് പുതിയ കമ്മീഷണറെ സ്വീകരിച്ചു.
കാസർഗോഡ് രാവണേശ്വരം സ്വദേശിയായ നിധിൻ രാജ്, കോഴിക്കോട് റൂറൽ എസ്.പി ആയി സേവനമനുഷ്ഠിക്കുകയായിരുന്നു.
അവിടെ നിന്നാണ് അദ്ദേഹത്തിന് കണ്ണൂർ സിറ്റി പൊലീസ് കമ്മീഷണറായി സ്ഥാനമാറ്റം ലഭിച്ചിരിക്കുന്നത്. ഇതിനു മുമ്പ് തലശേരിയിൽ അസിസ്റ്റന്റ് സൂപ്രണ്ടായി പ്രവർത്തിച്ചിട്ടുണ്ട്.
സർക്കാർ സ്‌കൂളിൽ പഠിച്ചാണ് സിവിൽ സർവീസ് പരീക്ഷയിൽ നിധിൻ രാജ് മികച്ച വിജയം നേടിയത്. പത്താം ക്ലാസ് വരെ രാവണീശ്വരം ഗവ. ഹയർ സെക്കൻഡറി സ്‌കൂളിലാണ് പഠിച്ചത്.
പ്ലസ് ടു പഠനം കാഞ്ഞങ്ങാട് ദുർഗാ ഹയർ സെക്കൻഡറി സ്‌കൂളിലായിരുന്നു. കോട്ടയം ഗവ. എൻജിനീയറിങ് കോളജിലായിരുന്നു ഉന്നത പഠനം.
