കെഎസ്ഇബി സെക്ഷൻ ഓഫിസുകളുമായി ബന്ധപ്പെട്ട ഭൂരിഭാഗം ഉപഭോക്തൃ സേവനങ്ങൾക്കും ജി എസ് ടി ഒഴിവാക്കി.
വൈദ്യുതി വിതരണ കമ്പനികളുടെ വിതരണ പ്രസരണ ഇടപാടുകൾക്ക് ജി എസ് ടി കൗൺസിൽ ഇളവ് നൽകിയതിനെ തുടർന്നാണിത്. വൈദ്യുതി ബില്ലിലെ മീറ്റർ വാടകയും കുറയും.
നിലവിൽ ബന്ധപ്പെട്ട ഭൂരിഭാഗം ഇടപാടുകൾക്കും 18% ആണ് ജി എസ് ടി. വൈദ്യുതി ബില്ലിലെ വിവിധ വിഭാഗങ്ങളിൽ ജി എസ് ടി ഈടാക്കുന്നത് മീറ്റർ വാടകയ്ക്കാണ്.
ത്രീ ഫെയ്സ് കണക്ഷന് മീറ്റർ വാടകയായി 30 രൂപ നൽകുന്നവർ കേന്ദ്ര, സംസ്ഥാന ജി എസ് ടി വിഹിതം 5.40 രൂപ അധികമായി അടക്കണം.
ഇനി മുതൽ ബില്ലിൽ 5.40 രൂപ കുറയും. 6 രൂപ മുതൽ 1000 രൂപ വരെ മീറ്റർ വാടകയുള്ള വിവിധ വിഭാഗം ഉപഭോക്താക്കൾക്ക് ഇത്തരത്തിൽ തുക കുറയും.
സെക്ഷൻ ഓഫിസുകളുമായി ബന്ധപ്പെട്ട വിവിധ ഡിപ്പോസിറ്റ് ജോലികൾക്കും നികുതി ഒഴിവാകും. വീടിന് സമീപത്തെ പോസ്റ്റ് മാറ്റി സ്ഥാപിക്കുന്നത് ഡിപ്പോസിറ്റ് ജോലിയാണ്.
