കണ്ണൂർ : പി ജയരാജനും ഇപി ജയരാജനും ഇക്കാര്യങ്ങളൊന്നും അറിയാത്ത സാധുക്കളാണെന്ന് പി വി അൻവർ എംഎൽഎ പ്രസ്താവിച്ചു. പി ജയരാജനുമായി അവിശുദ്ധ ബന്ധമില്ലെന്നും ആരോപണങ്ങളിൽ പങ്കില്ലെന്നും അൻവർ വ്യക്തമാക്കി. എന്നാൽ, ഏത് സംസ്ഥാന സമിതി അംഗവുമായാണ് ഗൾഫിൽ വെച്ച് കൂടിക്കാഴ്ച നടത്തിയതെന്ന് അൻവർ വിശദീകരിക്കണമെന്ന് പി ജയരാജൻ ആവശ്യപ്പെട്ടു. താൻ ഗൾഫിൽ വെച്ച് അൻവറിനെ കണ്ടിട്ടില്ലെന്നും, അൻവറിന് പിന്നിൽ താനാണെന്ന പ്രചരണം റേറ്റിങ് വർദ്ധിപ്പിക്കാനുള്ള നുണ പ്രചാരണമാണെന്നും പി ജയരാജൻ പ്രതികരിച്ചു.
കോടിയേരിയുടെ വിലാപയാത്ര സംബന്ധിച്ച കാര്യങ്ങൾ പാർട്ടി കൂട്ടായി തീരുമാനിച്ചതാണെന്ന പി ജയരാജന്റെ പ്രസ്താവനയ്ക്ക് മറുപടിയായി, കണ്ണൂരിൽ നിന്നുള്ള ഒരു സഖാവ് തന്നോട് പറഞ്ഞ കാര്യം വാർത്താസമ്മേളനത്തിൽ പങ്കുവെച്ചുവെന്നുള്ളൂ എന്ന് അൻവർ വിശദീകരിച്ചു. ആരോപണങ്ങൾ ഉന്നയിച്ചതിന്റെ പേരിൽ ജയിലിൽ അടച്ചാലും പ്രശ്നമില്ലെന്നും, താൻ ഇപ്പോൾ നിൽക്കുന്നത് ജനകീയ കോടതിയുടെ മുന്നിലാണെന്നും അൻവർ പറഞ്ഞു. പ്രകടനവും കല്ലേറും എല്ലാം പ്രതീക്ഷിച്ചാണ് നിൽക്കുന്നതെന്നും, തന്നെ പൂമെത്തയിൽ കൊണ്ടുനടക്കുമെന്ന് കരുതുന്നില്ലെന്നും അദ്ദേഹം കൂട്ടിച്ചേർത്തു.
മുഖ്യമന്ത്രി പറഞ്ഞ 188 കേസുകളും അന്വേഷിക്കാൻ കേരളത്തിലെ നിലവിലുള്ള സിറ്റിംഗ് ജഡ്ജിയുടെ അധ്യക്ഷതയിൽ സിപിഐഎമ്മും മുഖ്യമന്ത്രിയും തയ്യാറുണ്ടോയെന്ന് അൻവർ ചോദിച്ചു. എഡിജിപിയുടെ ഗുണ്ടകളായ പൊലീസിനെ വെച്ച് തന്റെ പേരിൽ കള്ളക്കടത്തിന് കൂട്ടുനിന്നുവെന്ന് പറഞ്ഞ് കേസുണ്ടാക്കാനുള്ള ശ്രമമാണോ നടത്തുന്നതെന്നും, അതാണോ കേരളത്തിലെ കമ്മ്യൂണിസ്റ്റുകാർ അംഗീകരിക്കുന്നതെന്നും അദ്ദേഹം ചോദ്യമുന്നയിച്ചു.
