കൊച്ചി: യൂത്ത് ലീഗ് പ്രവർത്തകനായിരുന്ന അരിയിൽ ഷുക്കൂറിനെ വധിച്ച കേസിൽ സി.പി.എം സംസ്ഥാന സെക്രട്ടേറിയറ്റ് അംഗം പി. ജയരാജനെയും സംസ്ഥാന സമിതി അംഗം ടി.വി. രാജേഷിനെയും കോടതി വെറുതെ വിട്ടു. എറണാകുളത്തെ പ്രത്യേക സി.ബി.ഐ കോടതിയാണ് ഏറെ രാഷ്ട്രീയ പ്രാധാന്യമുള്ള കേസിൽ നിർണ്ണായക വിധി പ്രസ്താവിച്ചത്.
ഇരുവർക്കുമെതിരെ സി.ബി.ഐ ചുമത്തിയ ഗൂഢാലോചനക്കുറ്റം തെളിയിക്കാൻ പ്രോസിക്യൂഷന് സാധിച്ചില്ലെന്ന് കോടതി കണ്ടെത്തി. തളിപ്പറമ്പ് സഹകരണ ആശുപത്രിയിലെ മുറിയിൽ വെച്ച് പി. ജയരാജനും ടി.വി. രാജേഷും അടക്കമുള്ളവർ ഗൂഢാലോചന നടത്തിയാണ് കൊലപാതകം ആസൂത്രണം ചെയ്തതെന്നായിരുന്നു സി.ബി.ഐയുടെ പ്രധാന ആരോപണം. എന്നാൽ, ഇത് സംശയാതീതമായി തെളിയിക്കാനുള്ള തെളിവുകൾ ഹാജരാക്കാൻ അന്വേഷണ ഏജൻസിക്ക് കഴിഞ്ഞില്ലെന്ന് വിലയിരുത്തിയാണ് കോടതി ഇരുവരെയും കുറ്റവിമുക്തരാക്കിയത്.
