ന്യൂഡൽഹി: കേരളത്തിൽ കേന്ദ്ര സർക്കാരിന്റെ പിഎം ശ്രീ (PM SHRI) പദ്ധതി നടപ്പിലാക്കിയിട്ടില്ലെന്ന് വ്യക്തമാക്കി കേന്ദ്ര വിദ്യാഭ്യാസ മന്ത്രാലയം. പദ്ധതിക്കായി സംസ്ഥാന സർക്കാരുമായി ധാരണാപത്രം (MoU) ഒപ്പുവെച്ചതല്ലാതെ നിലവിൽ ഒരു സ്കൂൾ പോലും തിരഞ്ഞെടുക്കപ്പെട്ടിട്ടില്ലെന്ന് കേന്ദ്രം ലോക്സഭയിൽ വ്യക്തമാക്കി.
കേരളത്തിൽ നിന്ന് പദ്ധതിക്കായി നിർദ്ദേശിക്കപ്പെട്ട സ്കൂളുകളുടെ അന്തിമ പട്ടിക ലഭിക്കാത്തതാണ് നടപടികൾ വൈകാൻ കാരണമെന്നാണ് വിശദീകരണം. ധാരണാപത്രത്തിൽ ഒപ്പുവെച്ച ശേഷം മാത്രമാണ് വിദ്യാലയങ്ങൾ തിരഞ്ഞെടുക്കുന്നതിനുള്ള നടപടിക്രമങ്ങൾ ആരംഭിക്കുകയെന്നും കേന്ദ്ര സർക്കാർ അറിയിച്ചു.
കേന്ദ്രാവിഷ്കൃത പദ്ധതിയായ പിഎം ശ്രീ വഴി രാജ്യത്തെ തെരഞ്ഞെടുക്കപ്പെട്ട സ്കൂളുകളെ മികച്ച നിലവാരത്തിലേക്ക് ഉയർത്താനാണ് ലക്ഷ്യമിടുന്നത്. പദ്ധതിയുമായി ബന്ധപ്പെട്ട് കേന്ദ്ര-സംസ്ഥാന സർക്കാരുകൾ തമ്മിൽ തർക്കങ്ങൾ നിലനിന്നിരുന്നെങ്കിലും പിന്നീട് ധാരണാപത്രം ഒപ്പുവെക്കാൻ സംസ്ഥാനം തയ്യാറാവുകയായിരുന്നു. എങ്കിലും നിലവിൽ പദ്ധതി നടപ്പിലാക്കുന്നതിലേക്ക് കാര്യങ്ങൾ എത്തിയിട്ടില്ലെന്നാണ് കേന്ദ്രത്തിന്റെ പുതിയ റിപ്പോർട്ട് ചൂണ്ടിക്കാണിക്കുന്നത്.
