പശ്ചിമേഷ്യൻ സംഘർഷത്തിന് അയവുവന്നതോടെ അന്താരാഷ്ട്ര വിപണിയിൽ ക്രൂഡ് ഓയിൽ വിലയിൽ വലിയ ഇടിവ് രേഖപ്പെടുത്തി. മേഖലയിൽ താത്ക്കാലിക വെടിനിർത്തൽ പ്രാബല്യത്തിൽ വന്നതും, ഹോർമൂസ് കടലിടുക്കിന്റെ കാര്യത്തിൽ ധാരണയിലെത്തിയതും എണ്ണ വിപണിയിൽ അനുകൂലമായ മാറ്റങ്ങൾ സൃഷ്ടിച്ചു. ക്രൂഡ് ഓയിൽ വിലയിൽ ബാരലിന് ഏകദേശം 13.62 ശതമാനത്തിന്റെ കുറവാണ് ഉണ്ടായിരിക്കുന്നത്.
നിലവിൽ ക്രൂഡ് ഓയിൽ വില ബാരലിന് 95.068 ഡോളർ (ഏകദേശം 8,786.41 രൂപ) എന്ന നിലയിലാണ് വ്യാപാരം നടക്കുന്നത്. സംഘർഷം മൂർച്ഛിച്ച സമയത്ത് ബാരലിന് 109.77 ഡോളർ (ഏകദേശം 10,145.99 രൂപ) എന്ന ഉയർന്ന നിരക്കിലേക്ക് എണ്ണ വില കുതിച്ചുയർന്നിരുന്നു. ഇതിൽ നിന്ന് ഏകദേശം 20 ഡോളറിന്റെ കുറവാണ് ഇപ്പോൾ ഉണ്ടായിരിക്കുന്നത്. കഴിഞ്ഞ 35 ദിവസമായി നീണ്ടുനിന്ന സംഘർഷാവസ്ഥയ്ക്കിടയിൽ എണ്ണവിലയിൽ ഉണ്ടാകുന്ന ഏറ്റവും വലിയ ഇടിവാണിത്.
പശ്ചിമേഷ്യൻ പ്രതിസന്ധിയെ തുടർന്ന് ആഗോള എണ്ണ വിതരണ ശൃംഖല കടുത്ത സമ്മർദ്ദത്തിലായിരുന്നു. വെടിനിർത്തൽ കരാർ പ്രാബല്യത്തിൽ വന്നതോടെ വിതരണ മേഖലയിലെ ആശങ്കകൾക്ക് ശമനമായിട്ടുണ്ട്. ഈ വിലക്കുറവ് ആഗോള സാമ്പത്തിക വിപണിയിലും വലിയ മാറ്റങ്ങൾക്കും ആശ്വാസത്തിനും വഴിയൊരുക്കുമെന്നാണ് വിലയിരുത്തപ്പെടുന്നത്.
