കൊല്ലം: കായികതാരങ്ങളെ വാഹനം ഇടിച്ചുതെറിപ്പിച്ച സംഭവത്തിൽ ബിന്ദു കൃഷ്ണയുടെ പ്രസ്താവനകൾ രാഷ്ട്രീയ കേരളത്തിൽ പുതിയ തർക്കങ്ങൾക്ക് വഴിതുറക്കുന്നു. അപകടമുണ്ടാക്കിയ കാർ ഓടിച്ചത് തൻ്റെ മകനല്ലെന്ന് ആവർത്തിക്കുമ്പോഴും, ഡ്രൈവർ ആര് എന്ന കാര്യത്തിലാണ് ബിന്ദു കൃഷ്ണ ഇപ്പോൾ മലക്കംമറിഞ്ഞിരിക്കുന്നത്.
വൈരുദ്ധ്യങ്ങൾ ഇങ്ങനെ:
ആദ്യ നിലപാട്:
കാർ ഓടിച്ചത് മകനല്ലെന്നും കാറിലുണ്ടായിരുന്നത് കെ.എസ്.യു പ്രവർത്തകരാണെന്നുമാണ് ഇന്നലെ ബിന്ദു കൃഷ്ണ വ്യക്തമാക്കിയത്.
പുതിയ വാദം:
എന്നാൽ ഇന്ന് നിലപാട് മാറ്റിയ അവർ, കാർ ഓടിച്ചത് മകൻ്റെ കൂട്ടുകാരനാണെന്നും അയാൾ തിരുവനന്തപുരത്തെ ഒരു പ്രമുഖ സി.പി.എം നേതാവിൻ്റെ മകനാണെന്നും ആരോപിച്ചു.
അപകടവിവരം
കൊട്ടിക്കലാശം കഴിഞ്ഞ് മടങ്ങുന്നതിനിടെയാണ് അപകടം സംഭവിച്ചത്. വള്ളിക്കീഴ് ഗവ. സ്കൂളിലെ എട്ടാം ക്ലാസ് വിദ്യാർത്ഥിനികളായ ധനലക്ഷ്മി (14), ചിഞ്ചുലക്ഷ്മി (14) എന്നിവർക്കാണ് അപകടത്തിൽ പരിക്കേറ്റത്. കായിക പരിശീലനത്തിന് ശേഷം മടങ്ങുകയായിരുന്ന കുട്ടികൾക്ക് നേരെ വാഹനം പാഞ്ഞുകയറുകയായിരുന്നു. കാറിനെക്കുറിച്ചുള്ള വിവരങ്ങൾ:
ബിന്ദു കൃഷ്ണയുടെ മകൻ കെ.കെ. ശ്രീകൃഷ്ണയുടെ പേരിലുള്ള KL 16 R 2935 നമ്പർ ആൾട്ടോ കാറാണ് അപകടത്തിൽപ്പെട്ടത്. അപകടസമയത്ത് കാറിനുള്ളിൽ കെ.എസ്.യു, കോൺഗ്രസ് കൊടികളും ബിന്ദു കൃഷ്ണയുടെ പ്രചാരണ പോസ്റ്ററുകളും ഉണ്ടായിരുന്നതായി പോലീസ് കണ്ടെത്തിയിട്ടുണ്ട്.
സ്വന്തം മകൻ്റെ പേരിലുള്ള വാഹനത്തിൽ കോൺഗ്രസ് പ്രചാരണ സാമഗ്രികളുമായി സി.പി.എം നേതാവിൻ്റെ മകൻ എന്തിനാണ് യാത്ര ചെയ്തതെന്ന ചോദ്യം ഇതിനോടകം തന്നെ സോഷ്യൽ മീഡിയയിലും രാഷ്ട്രീയ വൃത്തങ്ങളിലും ഉയർന്നു കഴിഞ്ഞു. സംഭവത്തിൽ പോലീസ് അന്വേഷണം ഊർജിതമാക്കിയിട്ടുണ്ട്.
