ന്യൂഡൽഹി: ഇന്ധന വിപണിയിൽ സാധാരണക്കാരെയും വാഹന ഉടമകളെയും ആശങ്കയിലാക്കി ഇന്ത്യൻ ഓയിൽ കോർപ്പറേഷൻ (IOC) പ്രീമിയം പെട്രോളിന്റെയും ഡീസലിന്റെയും വില കുത്തനെ വർധിപ്പിച്ചു. കമ്പനിയുടെ ഏറ്റവും ഉയർന്ന നിലവാരമുള്ള 'എക്സ്പി 100' (XP 100) പെട്രോളിന് ലിറ്ററിന് 11 രൂപയാണ് വർധിപ്പിച്ചത്. ഇതോടെ ഈ ഇന്ധനത്തിന്റെ വില ലിറ്ററിന് 149 രൂപയിൽ നിന്ന് 160 രൂപയായി ഉയർന്നു.
ഡീസലിനും വില വർധിച്ചു
പ്രീമിയം പെട്രോളിന് പിന്നാലെ ഡീസൽ വിഭാഗത്തിലും വിലവർധനയുണ്ട്. ഇന്ത്യൻ ഓയിലിന്റെ 'എക്സ്ട്രാ ഗ്രീൻ' (XtraGreen) ഡീസൽ ലിറ്ററിന് 91.49 രൂപയിൽ നിന്ന് 92.99 രൂപയായാണ് വർധിപ്പിച്ചത്. രാജ്യത്തെ ഇന്ധന വിതരണ ശൃംഖലയിൽ നേരിടുന്ന പ്രതിസന്ധിക്കിടയിലാണ് പൊതുമേഖലാ എണ്ണക്കമ്പനിയുടെ ഈ നീക്കം.
കാരണം പശ്ചിമേഷ്യൻ സംഘർഷം
പശ്ചിമേഷ്യയിൽ നിലനിൽക്കുന്ന യുദ്ധസമാനമായ സാഹചര്യവും ആഗോളതലത്തിലെ ഇന്ധനക്ഷാമവുമാണ് ഈ വിലവർധനവിന് പിന്നിലെ പ്രധാന കാരണം. ക്രൂഡ് ഓയിൽ ഇറക്കുമതിയിൽ നേരിടുന്ന തടസ്സങ്ങൾ ആഭ്യന്തര വിപണിയിൽ വലിയ ആഘാതമാണ് സൃഷ്ടിക്കുന്നത്. പ്രീമിയം ഇന്ധനങ്ങളുടെ വില വർധിച്ചതോടെ വരും ദിവസങ്ങളിൽ സാധാരണ പെട്രോൾ, ഡീസൽ വിലകളിലും മാറ്റമുണ്ടാകുമോ എന്ന ആശങ്കയിലാണ് ഉപഭോക്താക്കൾ.
നിലവിൽ പുതുക്കിയ നിരക്കുകൾ രാജ്യത്തുടനീളം പ്രാബല്യത്തിൽ വന്നു. ഹോട്ടൽ മേഖലയിൽ വാണിജ്യ സിലിണ്ടറുകൾക്ക് വില വർധിപ്പിച്ചതിന് പിന്നാലെ ഇന്ധനവിലയും ഉയരുന്നത് സാധാരണക്കാരുടെ കുടുംബ ബജറ്റിനെ സാരമായി ബാധിച്ചേക്കും.
