ന്യൂഡല്ഹി: രാജ്യത്ത് പ്രീമിയം പെട്രോളിന്റെ വില വർദ്ധിച്ചു. രാജ്യത്തെ പ്രമുഖ എണ്ണക്കമ്പനികളെല്ലാം പ്രീമിയം പെട്രോള് വകഭേദങ്ങളുടെ വില വർധിപ്പിച്ചു.
ഭാരത് പെട്രോളിയം (BPCL), ഹിന്ദുസ്ഥാൻ പെട്രോളിയം (HPCL), ഇന്ത്യൻ ഓയില് (IOCL) എന്നീ കമ്പനികള് തങ്ങളുടെ പ്രീമിയം പെട്രോളിന് ലിറ്ററിന് 2 രൂപ മുതല് 2.35 രൂപ വരെയാണ് വർധിപ്പിച്ചത്. ഇന്ന് (2026 മാർച്ച് 20) മുതല് പുതുക്കിയ നിരക്കുകള് നിലവില് വന്നതായാണ് ഔദ്യോഗിക വൃത്തങ്ങള് നല്കുന്ന സൂചന. എന്നാല് സാധാരണ പെട്രോള്, ഡീസല് വിലകളില് നിലവില് മാറ്റമില്ല.
എന്താണ് ഈ വിലവർധനവിന് പിന്നില്?
പശ്ചിമേഷ്യയില് ഇസ്രായേലും ഇറാനും തമ്മില് നിലനില്ക്കുന്ന കടുത്ത യുദ്ധ സാഹചര്യമാണ് ആഗോള വിപണിയില് എണ്ണവില കുതിച്ചുയരാൻ കാരണമായിരിക്കുന്നത്.
ലോകത്തെ ഊർജ്ജ വിതരണത്തിന്റെ 20 ശതമാനവും ഗതാഗതം ചെയ്യപ്പെടുന്ന ഹോർമുസ് കടലിടുക്കിലെ സംഘർഷം ക്രൂഡ് ഓയില് വില ബാരലിന് 100 ഡോളറിന് മുകളില് എത്തിച്ചിരിക്കുകയാണ്. ഇതിന്റെ പ്രതിഫലനമാണ് ഇപ്പോള് ഇന്ത്യയിലെ ഇന്ധന വിപണിയിലും കാണുന്നത്.
ഹിന്ദുസ്ഥാൻ പെട്രോളിയത്തിന്റെ 'പവർ' (Power), ഭാരത് പെട്രോളിയത്തിന്റെ 'സ്പീഡ്' (Speed), ഇന്ത്യൻ ഓയിലിന്റെ 'XP95' എന്നീ പ്രീമിയം ബ്രാൻഡുകള് ഉപയോഗിക്കുന്ന വാഹന ഉടമകളെയാണ് ഈ തീരുമാനം നേരിട്ട് ബാധിക്കുക.
പ്രീമിയം ഇന്ധനങ്ങള് സാധാരണ പെട്രോളിനേക്കാള് മികച്ച പ്രകടനവും എൻജിൻ സുരക്ഷയും വാഗ്ദാനം ചെയ്യുന്നവയാണ്. അതുകൊണ്ടുതന്നെ പുതിയ തലമുറ കാറുകളും ബൈക്കുകളും ഉപയോഗിക്കുന്നവർക്ക് ഈ വിലക്കയറ്റം തിരിച്ചടിയാകും. ലിറ്ററിന് ഏകദേശം 2.09 രൂപ മുതല് 2.35 രൂപ വരെയാണ് വിവിധ നഗരങ്ങളില് വർധന രേഖപ്പെടുത്തിയിരിക്കുന്നത്.
സാധാരണ പെട്രോളും ഡീസലും: നിലവിലെ അവസ്ഥ
അതെസമയം സാധാരണ പെട്രോളിന്റെയും ഡീസലിന്റെയും വിലയില് നിലവില് മാറ്റമില്ല. കേരളത്തില് പെട്രോള് വില ലിറ്ററിന് ശരാശരി 106.44 രൂപയായും ഡീസല് വില 95.38 രൂപയായും തുടരുകയാണ്. തിരുവനന്തപുരത്ത് പെട്രോള് വില 107.33 രൂപയാണ്. കൊച്ചിയില് 106.08 രൂപയും.
അതേസമയം ഇറാൻ-ഇസ്രായേല് സംഘർഷം വരും ദിവസങ്ങളില് കൂടുതല് രൂക്ഷമായാല് സാധാരണ പെട്രോളിനും ഡീസലിനും വില കൂടാനിടയുണ്ട്. ക്രൂഡ് ഓയില് വില ബാരലിന് 110 ഡോളറിന് മുകളില് തുടർച്ചയായി നിന്നാല് സാധാരണ പെട്രോളിനും വില ഉയരും.
പാചകവാതക വിപണിയിലെ ആശങ്കകള്
അതേ സമയം ഈ മാസം ഏഴാം തീയതി ഗാർഹിക എല്പിജി സിലിണ്ടറുകള്ക്ക് 60 രൂപ വർധിപ്പിച്ചിരുന്നു. പശ്ചിമേഷ്യയിലെ പ്രതിസന്ധി മൂലം എല്പിജി ഇറക്കുമതിയില് തടസ്സങ്ങള് നേരിട്ട സാഹചര്യത്തിലായിരുന്നു വിലവർധന. എന്നാല് രാജ്യത്ത് ഗ്യാസ് ക്ഷാമമില്ലെന്നും അധികൃതർ ആവർത്തിക്കുന്നുണ്ട്. യുദ്ധം നീണ്ടുപോയാല് ഷിപ്പിംഗ് നിരക്കുകള് വർധിക്കുകയും വീണ്ടും വിലക്കയറ്റം ഉണ്ടാകുകയും ചെയ്തേക്കാം. നിലവില് 913 രൂപയാണ് ഗാർഹിക സിലിണ്ടറുകള്ക്ക് വില.
സാധാരണക്കാരെ എങ്ങനെ ബാധിക്കും?
സാധാരണക്കാർ ഉപയോഗിക്കുന്ന പെട്രോള്, ഡീസല് വിലകള് വർധിച്ചില്ലെങ്കിലും പ്രീമിയം ഇന്ധനങ്ങളുടെ വില വർധിക്കുന്നത് പരോക്ഷമായി വിപണിയില് ചലനങ്ങള് ഉണ്ടാക്കാം.
വലിയ ട്രക്കുകളും ടാങ്കറുകളും സാധാരണ ഡീസല് ആണ് ഉപയോഗിക്കുന്നത്. എന്നാല് ആധുനിക ലോജിസ്റ്റിക് വാഹനങ്ങളില് പലതും മികച്ച പ്രകടനത്തിനായി പ്രീമിയം വകഭേദങ്ങള് ഉപയോഗിക്കാറുണ്ട്.
ഇത് ചരക്കുനീക്കത്തിന്റെ ചെലവ് വർധിക്കാൻ കാരണമാകും. വരാനിരിക്കുന്ന മാസങ്ങളില് ക്രൂഡ് ഓയില് വില കുറഞ്ഞില്ലെങ്കില് സാധാരണ പെട്രോള് വിലയും വർധിപ്പിക്കാൻ സാധ്യതയുള്ളതിനാല് കുടുംബ ബജറ്റുകളെ ഇത് സാരമായി ബാധിക്കും.
