എറണാകുളം: ആലുവ തോട്ടയ്ക്കാട്ടുകരയിൽ ഒരേ രാത്രിയിൽ നാല് വീടുകളിൽ കള്ളൻ കയറിയ സംഭവം പ്രദേശവാസികളെ നടുക്കി. സുജിത്തിൻറെ വീട്ടിലാണ് പ്രധാനമായ മോഷണം നടന്നത്. അലമാര കുത്തിത്തുറന്ന് ഏഴ് പവൻ സ്വർണം മോഷ്ടിച്ച നിലയിലാണ് പൊലീസ് കേസ് രജിസ്റ്റർ ചെയ്തത്.
സംഭവം കഴിഞ്ഞ രാത്രി വൈകിയാണ് നടന്നത്. തോട്ടയ്ക്കാട്ടുകരയിലെ റൂറൽ എസ്.പിയുടെ ക്യാമ്പ് ഓഫീസിനടുത്തുള്ള സുജിത്തിൻറെ വീടിലാണ് മോഷ്ടാവ് ആദ്യം കയറിയത്. അലമാര പൊളിച്ച് ആഭരണങ്ങൾ എടുത്ത ശേഷം മോഷ്ടാവ് സമീപത്തെ മറ്റുമൂന്നു വീടുകളിലും കയറാൻ ശ്രമിച്ചു.
മറ്റു വീടുകളിൽ ജനാലകൾ തകർത്തതും വാതിലുകൾ ഇളക്കാൻ ശ്രമിച്ചതും പൊലീസ് സ്ഥിരീകരിച്ചു. ഒരു വീട്ടിൽ നിന്ന് മോഷണത്തിന് ഉപയോഗിച്ച കമ്പിപ്പാരയും പൊലീസ് കണ്ടെത്തി.
മോഷ്ടാവ് നടന്ന് നീങ്ങുന്ന ദൃശ്യങ്ങൾ സി.സി.ടി.വി ക്യാമറയിൽ പകർത്തപ്പെട്ടതായും, ദൃശ്യങ്ങൾ അടിസ്ഥാനമാക്കി പൊലീസ് അന്വേഷണം പുരോഗമിക്കുകയാണെന്നും അധികൃതർ അറിയിച്ചു. മോഷണത്തിന് കൂടുതൽ ആളുകൾ പങ്കുണ്ടോയെന്ന കാര്യവും പൊലീസ് പരിശോധിച്ചുവരുന്നു.
