സീബ്രാ ക്രോസിംഗുകളിൽ കാൽനടയാത്രക്കാർക്ക് പരിഗണന നൽകാതെ നിയമം ലംഘിക്കുന്ന വാഹന ഉടമകൾക്കെതിരെ കർശന നടപടി സ്വീകരിക്കണമെന്ന് ഹൈക്കോടതി. കുറ്റം ആവർത്തിക്കുന്നവരുടെ ഡ്രൈവിങ് ലൈസൻസ് റദ്ദാക്കുന്നത് ഉൾപ്പെടെയുള്ള നടപടികൾ സ്വീകരിക്കണം. കാൽനടയാത്രക്കാർക്ക് പ്രാധാന്യം നൽകുന്ന ഒരു ഡ്രൈവിങ് സംസ്കാരം കൊണ്ടുവരാൻ ഉടനടി നടപടി സ്വീകരിക്കണമെന്നും കോടതി നിർദ്ദേശിച്ചു.
സീബ്രാ ക്രോസിംഗുകളിൽ പ്രധാന അവകാശം കാൽനടയാത്രക്കാർക്കാണെന്ന ബോധം ഡ്രൈവർമാരിൽ വളർത്തണം. ലൈസൻസിനായുള്ള റോഡ് ടെസ്റ്റ് നടത്തുമ്പോൾ ഇക്കാര്യം പ്രത്യേകം പരിശോധിക്കണമെന്നും ജസ്റ്റിസ് ദേവൻ രാമചന്ദ്രൻ ഉത്തരവിട്ടു.
ഈ വർഷം ഒക്ടോബർ 31 വരെ സീബ്രാലൈൻ മറികടക്കുന്നതിനിടെ 218 പേർ വാഹനമിടിച്ച് മരിച്ചതായുള്ള മാധ്യമ റിപ്പോർട്ടുകൾ പരിഗണിച്ചാണ് കോടതിയുടെ നിർദ്ദേശം. ട്രാഫിക് ആൻഡ് റോഡ് സുരക്ഷാ ഐജി, ഗതാഗത കമ്മിഷണർ, പൊതുമരാമത്ത് പ്രിൻസിപ്പൽ സെക്രട്ടറി എന്നിവർ ഓൺലൈനായി കോടതിയിൽ ഹാജരായി വിവരങ്ങൾ നൽകി.
ഹൈക്കോടതി ഉത്തരവിന്റെ പശ്ചാത്തലത്തിൽ, സീബ്രാലൈനിലൂടെ റോഡ് മുറിച്ചുകടക്കാൻ ശ്രമിക്കുന്നവരെ ഹോൺ അടിച്ചോ വേഗം കൂട്ടിയോ ഭയപ്പെടുത്തുന്ന ഡ്രൈവർമാരുടെ ലൈസൻസ് സസ്പെൻഡ് ചെയ്യാൻ ട്രാൻസ്പോർട്ട് കമ്മിഷണർ നാഗരാജു നിർദേശം നൽകി.
