കൊച്ചി: ലൈംഗികാരോപണക്കേസില്‍ യുവതി നേരിട്ടു മുഖ്യമന്ത്രിക്കു പരാതി നല്‍കിയതോടെ മുന്‍കൂര്‍ ജാമ്യത്തിനു കീഴ്‌ക്കോടതിയെ സമീപിക്കാന്‍ പാലക്കാട്‌ എം.എല്‍.എ രാഹുല്‍ മാങ്കൂട്ടം നീക്കം തുടങ്ങി.
ഇന്നു തന്നെ ഹര്‍ജി നല്‍കിയേക്കും. കേസുമായി ബന്ധപ്പെട്ട്‌ ഇന്നലെ രാഹുലിനു വേണ്ടി കൊച്ചിയിലെ മുതിര്‍ന്ന അഭിഭാഷകനുമായി ചര്‍ച്ച നടന്നു.
രാഹുലിനെതിരായ ലൈംഗികാരോപണങ്ങള്‍ അന്വേഷിക്കാന്‍ സംസ്‌ഥാന പോലീസ്‌ ക്രൈംബ്രാഞ്ച്‌ പ്രത്യേക അന്വേഷണ സംഘത്തെ (എസ്.ഐ.ടി.) രൂപീകരിച്ചിട്ടുണ്ട്‌.
അന്വേഷണ ഉദ്യോഗസ്‌ഥനായ ഡിവൈ.എസ്.പി: വി. ബിനുകുമാര്‍ തന്നെയാകും തുടരന്വേഷണവും നടത്തുക. സുപ്രീം കോടതിയില്‍ നിന്ന്‌ അടുത്തിടെയുണ്ടായ നിര്‍ദേശമനുസരിച്ചു മുന്‍കൂര്‍ജാമ്യത്തിന്‌ ആദ്യം കീഴ്‌ക്കോടതിയെയാണു സമീപിക്കേണ്ടത്‌.
അവിടെ തള്ളുന്ന പക്ഷം ഹൈക്കോടതിയെ സമീപിക്കാം. നേരത്തെ ഗര്‍ഭഛിദ്രം നടത്താന്‍ രാഹുല്‍ മാങ്കൂട്ടത്തിലിന്റെ സുഹൃത്ത്‌ സഹായിച്ചു എന്നതടക്കമുള്ള ചില തെളിവുകള്‍ ക്രൈംബ്രാഞ്ചിനു ലഭിച്ചിട്ടുണ്ട്‌.
അതൊരു യുവ വ്യവസായിയാണെന്നാണു നിഗമനം. ഇദ്ദേഹത്തില്‍ നിന്നുള്‍പ്പെടെ കൂടുതല്‍ വിവരങ്ങള്‍ തേടും. കൃത്യം നടത്തിയ ആശുപത്രിയും ഡോക്‌ടറും കുടുങ്ങും.
ആരോപിക്കപ്പെടുന്ന കുറ്റകൃത്യങ്ങളുടെ ഡിജിറ്റല്‍ സ്വഭാവം കണക്കിലെടുത്തു സൈബര്‍ ഫോറന്‍സിക്‌ വിദഗ്‌ധരെ എസ്.ഐ.ടിയില്‍ ഉള്‍പ്പെടുത്തിയിട്ടുണ്ട്‌.
യുവതിയുടെ രഹസ്യ മൊഴി ഉടന്‍ രേഖപ്പെടുത്തും. അതിനു ശേഷം രാഹൂലിനെ ചോദ്യം ചെയ്യുന്നതിനായി വിളിപ്പിക്കും. അറസ്‌റ്റ്‌ ചെയ്‌തു ചോദ്യം ചെയ്യാനാണു സാധ്യത.
അതിനു മുമ്പായി മുന്‍കൂര്‍ ജാമ്യാപേക്ഷ നല്‍കുന്ന പക്ഷം കോടതിയുടെ തീരുമാനമറിഞ്ഞേ അറസ്‌റ്റിലേക്കു നീങ്ങൂ. നിര്‍ബന്ധിത ഗര്‍ഭഛിദ്രത്തിനു പ്രേരിപ്പിച്ചുവെന്ന കുറ്റത്തിനു മുന്‍കൂര്‍ജാമ്യം ലഭിക്കുക പ്രയാസവുമാണ്‌.
ഹൈക്കോടതിയുടെ തീരുമാനംവരെ രാഹൂല്‍ പോലീസിനു പിടികൊടുക്കാതെ മാറിനില്‍ക്കാനാണു സാധ്യത. നിയമസഭാംഗമെന്ന ആനുകൂല്യം ക്രിമിനല്‍ കേസില്‍ ലഭിക്കില്ല. നിയമസഭാ സമ്മേളനം നടക്കുന്ന കാലയളവില്‍ മാത്രമേ അറസ്‌റ്റിനു സ്‌പീക്കറുടെ അനുമതി ആവശ്യമുള്ളൂ.
മാത്രമല്ല, ഒരു സ്‌ത്രീയുടെ ജീവന്‍ അപകടത്തിലാക്കിക്കൊണ്ട്‌ ഗര്‍ഭഛിദ്രത്തിനു നിര്‍ബന്ധിക്കുന്നതിന്റെ ഓഡിയോ റെക്കോര്‍ഡിങ്‌ വ്യാപകമായി പ്രചരിച്ചിരുന്നു.
എന്നാല്‍, വോയ്‌സ്‌ ക്ലിപ്പിലെ പുരുഷ ശബ്‌ദം തന്റേതാണെന്ന ആരോപണങ്ങള്‍ രാഹൂല്‍ മാങ്കൂട്ടത്തില്‍ നിഷേധിക്കുകയാണ്‌.
