തിരുവനന്തപുരം: ആരോപണങ്ങൾ തിരിച്ചടിച്ചതോടെ ഡോക്ടർ ഹാരിസിന് എതിരായ അന്വേഷണം അവസാനിപ്പിച്ച് തലയൂരാൻ ആരോഗ്യവകുപ്പ്. ഉപകരണം കാണാതായതിൽ കൂടുതൽ അന്വേഷണമുണ്ടാകില്ല. അസ്വാഭാവികമായ പെട്ടി കണ്ടതിലും സിസിടിവി ദൃശ്യത്തിലും പോലീസ് അന്വേഷണത്തിന് പോകില്ല. ആർക്കെതിരെയും നടപടി ശുപാർശയില്ലാതെ ഡിഎംഇ തിങ്കളാഴ്ച റിപ്പോർട്ട് സമർപ്പിക്കും.ഒരാഴ്ചത്തെ അനവധിക്ക് ശേഷം ഡോ. ഹാരിസ് ഇന്ന് തിരികെ ജോലിയിൽ പ്രവേശിച്ചേക്കും.
ഡോക്ടർ ഹാരിസിനെ ഉന്നമിട്ട് തുടങ്ങിയ അന്വേഷണം ആരോഗ്യവകുപ്പ് അവസാനിപ്പിക്കുന്നു. ഉപകരണം കാണാതായതായി പറയുന്ന സംഭവത്തിൽ കൂടുതൽ അന്വേഷണം ഉണ്ടാകില്ല. ഹാരിസിന്റെ മുറിയിൽ അസ്വാഭാവികമായി പെട്ടി കണ്ടു എന്ന വാദം പൊളിഞ്ഞതോടെ അക്കാര്യത്തിലും പോലീസ് അന്വേഷണത്തിന് സർക്കാർ പോകില്ല. ഹാരിസിനെ കുടുക്കാൻ നോക്കി സ്വയം കുടുങ്ങി എന്ന വികാരം സർക്കാർ തലത്തിൽ ശക്തമാണ്. ഹാരിസിനെ ഉന്നമിട്ട് ഇന്നലെ പ്രിൻസിപ്പലിനെയും സൂപ്രണ്ടിനേയും കൊണ്ട് നടത്തിച്ച വാർത്താ സമ്മേളനം കനത്ത പ്രതിച്ഛായ തകർച്ചയാണ് ആരോഗ്യവകുപ്പിന് ഉണ്ടാക്കിയത്. ഡോക്ടർ ഹാരിസിനെതിരെ നടപടിയുണ്ടാകില്ല എന്ന് കെജിഎംസിറ്റിഎക്ക് ആരോഗ്യമന്ത്രിയുടെ ഉറപ്പ് ലഭിച്ചു. ആരോഗ്യമന്ത്രിയുമായി കെജിഎംസിറ്റിഎ ചർച്ച നടത്തും. മെഡിക്കൽ കോളേജ് ആശുപത്രികളിലെ ഡോക്ടർമാരുടെ സൗകര്യങ്ങളിൽ പഠനം വേണമെന്ന് കെജിഎംസിറ്റിഎ ആവശ്യപ്പെടും.
