ന്യൂഡൽഹി: യു.എ.ഇയിൽ രണ്ട് ഇന്ത്യക്കാരുടെ വധശിക്ഷ നടപ്പാക്കിയതായി കേന്ദ്ര വിദേശകാര്യ മന്ത്രാലയം അറിയിച്ചു. കൊലക്കേസിൽ ഉൾപ്പെട്ട മലയാളികളായ മുഹമ്മദ് റിനാഷ് അരങ്ങിലോട്ട്, മുരളീധരൻ പെരുന്തട്ട വളപ്പിൽ എന്നിവരുടെ വധശിക്ഷയാണ് നടപ്പാക്കിയത്.
വിവരം ഇവരുടെ കുടുംബത്തെ അറിയിച്ചതായും സംസ്കാരത്തിൽ പങ്കെടുക്കാൻ സൗകര്യം ഒരുക്കാൻ ശ്രമിക്കുകയാണെന്നും കേന്ദ്രം അറിയിച്ചു.
ഇവരുടെ ദയാഹർജികൾ യു.എ.ഇയിലെ പരമോന്നത കോടതി തള്ളിയിരുന്നു.എമിറാത്തി പൗരനെ കൊലപ്പെടുത്തിയ കേസിലാണ് മുഹമ്മദ് റിനാഷിന്റെ വധശിക്ഷ നടപ്പാക്കിയത്. ഇന്ത്യക്കാരെന കൊലപ്പെടുത്തിയതിനാണ് മുരളീധരന് വധശിക്ഷ ലഭിച്ചത്.
യു.എ.ഇയിലെ ഇന്ത്യൻ എംബസി പ്രതികൾക്ക് നിയമസഹായവും മറ്റും നൽകിയതായും കേന്ദ്ര സർക്കാർ ദയാഹരജി നൽകിയത് ഉൾപ്പെടെ വധശിക്ഷ ഒഴിവാക്കാൻ സാധ്യമായ എല്ലാ പരിശ്രമവും നടത്തിയതായും അധികൃതർ അറിയിച്ചു. ഫെബ്രുവരി 28ന് ഇരുവരുടെയും വധശിക്ഷ നടപ്പാക്കിയതായി യു.എ.ഇ അധികൃതർ കേന്ദ്ര വിദേശകാര്യ മന്ത്രാലയത്തെ അറിയിച്ചുവെന്ന് മന്ത്രാലയം വാർത്താക്കുറിപ്പിൽ അറിയിച്ചു.
