കണ്ണൂർ: പകുതി വില തട്ടിപ്പിന് പിന്നാലെ ആത്മീയ തട്ടിപ്പും. ഓണ്‍ലൈൻ ആത്മീയ ക്ലാസുകളില്‍ പങ്കെടുത്താല്‍ സാമ്പത്തിക നേട്ടമുണ്ടാകുമെന്ന് പറഞ്ഞാണ് പുതിയ തട്ടിപ്പ്.
കേരളത്തിന് അകത്തും പുറത്തുമായി നിരവധിയാളുകള്‍ തട്ടിപ്പിന് ഇരയായതായാണ് വിവരം.
കണ്ണൂർ മമ്പറം സ്വദേശിയായ പ്രശാന്ത് മാറോളി എന്നയാളുടെ പരാതിക്ക് പിന്നാലെയാണ് തട്ടിപ്പ് പുറം ലോകം അറിയുന്നത്. ഇയാളുടെ പരാതിയില്‍ ഡോക്ടർമാർ ഉള്‍പ്പെടെ ആറു പേർക്കെതിരെ കണ്ണൂർ ടൗണ്‍ പൊലീസ് കേസ് എടുത്തു.
ഡോ. അഷ്റഫ്, ഡോ. അഭിനന്ദ് കാഞ്ഞങ്ങാട്, കെ എസ് പണിക്കർ, അനിരുദ്ധൻ, വിനോദ് കുമാർ, സനല്‍ എന്നിവരെയാണ് അറസ്റ്റ് ചെയ്തത്.
ഹിമാലയൻ തേർഡ് ഐ ട്രസ്റ്റിന്റെ പേരിലാണ് തട്ടിപ്പ് നടത്തിയത്. പ്രപഞ്ചോർജത്തെ ഫലപ്രദമായി ഉപയോഗിച്ച്‌ സർവോന്മുഖമായ നേട്ടം ആത്മീയ കാര്യങ്ങളില്‍ കൂടി കൈവരിക്കുമെന്ന് യൂട്യൂബില്‍ പരസ്യം നല്‍കിയാണ് തട്ടിപ്പ്.
സാമ്പത്തിക-വിദ്യാഭ്യാസ കാര്യങ്ങളില്‍ നേട്ടം, ജോലി ഉയർച്ച, സന്താന ഭാഗ്യം എന്നിവ ലഭിക്കുമെന്ന് ആളുകളെ വിശ്വസിപ്പിച്ചു. സ്റ്റാർ ഹോട്ടലുകള്‍ കേന്ദ്രീകരിച്ച്‌ ഒന്നാം പ്രതിയായ അഷ്റഫ് എന്നയാളാണ് ക്ലാസ് നടത്തിയത്.
ക്ലാസില്‍ പങ്കെടുക്കുന്നവരില്‍ നിന്ന് 14,000 രൂപ വാങ്ങുകയും ചെയ്യും. ഗുരുവിന്റെ അനുഗ്രഹം ലഭിക്കുന്നതിനായി ആയിരമോ, പതിനായിരമോ ലക്ഷങ്ങളോ നല്‍കാം.
ഇതിനായി ആയിരം പേരടങ്ങുന്ന വാട്സ് ആപ്പ് ഗ്രൂപ്പുമുണ്ട്. നേട്ടം ലഭിച്ചുവെന്ന് അവകാശപ്പെടുന്നവരുടെ വീഡിയോയും മറ്റ് വിവരങ്ങളും ഈ ഗ്രൂപ്പിലൂടെ വിശ്വാസം നേടാനായി പങ്കു വെക്കാറുണ്ടായിരുന്നു.
