ഡല്ഹി: രാജ്യത്ത് ഏകീകൃത പെൻഷൻ പദ്ധതി ( യൂനിഫൈഡ് പെൻഷൻ സ്കീം-യുപിഎസ്) ഏപ്രില് ഒന്നു മുതല് നിലവില് വരും.
കഴിഞ്ഞ വര്ഷം ഓഗസ്റ്റിലാണ് കേന്ദ്ര സർക്കാർ പദ്ധതി പ്രഖ്യാപിച്ചത്.
നാഷണല് പെൻഷൻ സ്കീം( എൻപിഎസ്) പരിരക്ഷയുള്ള കേന്ദ്ര സർക്കാർ ജീവനക്കാർക്ക് ആയിരിക്കും പദ്ധതിയ്ക്ക് അർഹത ഉണ്ടാവുക. എന്നാല് ജീവനക്കാർക്ക് ഏകീകൃത പെൻഷൻ പദ്ധതി തിരഞ്ഞെടുക്കാതെ എൻപിഎസില് തന്നെ തുടരാനും അവസരമുണ്ടാകും. കഴിഞ്ഞ ദിവസം ഇത് സംബന്ധിച്ച ഔദ്യോഗിക വിജ്ഞാപനം ധനമന്ത്രാലയം പുറത്തിറക്കി
യുപിഎസ് വിജ്ഞാപനമനുസരിച്ച്, 25 വർഷം സർവീസുള്ളവർക്ക് അവസാനത്തെ 12 മാസത്തെ ശരാശരി അടിസ്ഥാന ശമ്ബളത്തിന്റെ പകുതി പെൻഷനായി ലഭിക്കും. ഉദാഹരണത്തിന് 25 വർഷം സർവീസുള്ള വ്യക്തിക്ക് വിരമിക്കുന്ന സമയത്ത് 45,000 രൂപ പ്രതിമാസ വേതനമുണ്ടെങ്കില് (അടിസ്ഥാന ശമ്പളം + ഡിഎ) പകുതിയായ 22,500 രൂപയും അതതു സമയത്തെ ക്ഷാമാശ്വാസവും ലഭിക്കും.
സർവീസില് നിന്ന് പുറത്താക്കുകയോ രാജിവെക്കുകയോ ചെയ്താല് യുപിഎസ് പ്രകാപരമുള്ള പെൻഷന് ലഭിക്കില്ല. പത്ത് വർഷത്തിനും ഇരുപത്തിയഞ്ച് വർഷത്തിനും ഇടയില് സർവീസുള്ളവർക്ക് കുറഞ്ഞത് 10,000 രൂപ പ്രതിമാസ പെൻഷൻ പദ്ധതി ഉറപ്പുനല്കുന്നു.
എന്നാല് പത്ത് വർഷത്തില് താഴെ സർവ്വീസുള്ളവർക്ക് യുപിഎസിന് അർഹതയുണ്ടാകില്ല. പെൻഷൻകാരൻ മരണപ്പെട്ടാല് പെൻഷൻ തുകയുടെ 60% കുടുംബത്തിന് ലഭിക്കും. കൂടാതെ പെൻഷൻ തുകകള് പണപ്പെരുപ്പത്തിനനുസരിച്ച് ക്രമീകരിക്കും.
2004 ജനുവരി ഒന്നിനോ അതിന് ശേഷമോ സർവീസില് പ്രവേശിപ്പിച്ചവർക്കാണ് യുപിഎസ് ആനുകൂല്യം. എൻപിഎസില് ജീവനക്കാർ 10 ശതമാനവും സർക്കാർ 14 ശതമാനവുമാണ് പെൻഷൻ ഫണ്ടിലേക്ക് അടയ്ക്കേണ്ടത്.
എന്നാല് യുപിഎസില് സർക്കാർ വിഹിതം 14 ല് 18.5 ശതമാനമാക്കി ഉയർത്തിയിട്ടുണ്ട്. ജീവനക്കാരുടെ വിഹിതത്തില് മാറ്റമില്ല.
2024 മാർച്ച് 31 വരെയുള്ള കണക്കനുസരിച്ച് 26 ലക്ഷം കേന്ദ്രസർക്കാർ ജീവനക്കാർക്കും 66 ലക്ഷം സംസ്ഥാന സർക്കാർ ജീവനക്കാരും എൻപിഎസില് അംഗങ്ങളാണ്.
