കൊച്ചി: വിദേശത്ത് നിന്ന് അനധികൃതമായി കടത്തിയ പക്ഷികളുമായി നെടുമ്പാശേരി വിമാനത്താവളത്തിൽ രണ്ടു യുവാക്കൾ പിടിയിൽ. തായ്‌ലൻഡിൽ നിന്ന് കടത്തി കൊണ്ടു വന്ന പക്ഷികളെയാണ് കസ്റ്റംസ് പിടികൂടി സുരക്ഷിത സ്ഥാനത്തേക്ക് മാറ്റിയത്. ഞായറാഴ്ച്‌ച രാത്രി കൊച്ചിയിൽ വിമാനം ഇറങ്ങിയ തിരുവനന്തപുരം സ്വദേശികളായ ബിന്ദു, ശരത് എന്നിവരുടെ പക്കൽ നിന്നാണ് അപൂർവയിനത്തിൽപെട്ട പക്ഷികളെ പിടികൂടിയത്.
വിമാനത്താവളത്തിലെത്തിയ ഇവരുടെ പെരുമാറ്റത്തിൽ സംശയം തോന്നി കസ്റ്റംസ് ഉദ്യോഗസ്ഥർ ഇവരുടെ ബാഗേജുകൾ പരിശോധിക്കുകയായിരുന്നു. തുടർന്നാണ് വേഴാമ്പൽ ഉൾപ്പെടെ അപൂർവയിനത്തിൽ പെട്ട 14 പക്ഷികളെ കസ്റ്റംസ് പിടികൂടിയത്. കസ്റ്റംസും വനം വകുപ്പും പ്രതികളെ കസ്റ്റഡിയിലെടുത്ത് കൂടുതൽ ചോദ്യം ചെയ്തു വരികയാണ്. പക്ഷികളുടെ ആരോഗ്യനില പരിശോധിക്കുന്നതിനും പരിചരണത്തിനുമായി വെറ്ററിനറി ഡോക്ടർമാരെയും പക്ഷി വിദഗ്ധരെയും ഏൽപിച്ചു. കാർഡ് ബോർഡ് പെട്ടിക്കുള്ളിലും പ്ലാസ്റ്റിക് ബോക്സുകളിലുമായിട്ടാണ് ഇവർ പക്ഷികളെ ഒളിപ്പിച്ച് കടത്തിയിരുന്നത്.
