കോഴിക്കോട്: ഒരിടവേളയ്ക്ക് ശേഷം സംസ്ഥാനത്ത് വീണ്ടും ഷിഗെല്ല രോഗബാധ പടരുന്നു. ഈ മാസം ആദ്യ പത്ത് ദിവസത്തിനിടെ രോഗികളുടെ എണ്ണത്തിൽ ഗണ്യമായ വർധനവാണ് രേഖപ്പെടുത്തിയിരിക്കുന്നത്. ഒക്ടോബറിലെ ആദ്യ പത്ത് ദിനങ്ങൾക്കുള്ളിൽ മാത്രം 16 കേസുകൾ റിപ്പോർട്ട് ചെയ്തു. കഴിഞ്ഞ സെപ്റ്റംബർ മാസത്തിൽ ആകെ 32 പേർക്കായിരുന്നു ഷിഗെല്ല സ്ഥിരീകരിച്ചിരുന്നത്.
ഈ വർഷം ഇതുവരെ സംസ്ഥാനത്ത് 507 പേർക്കാണ് ഷിഗെല്ല രോഗബാധ സ്ഥിരീകരിച്ചത്. എട്ട് മരണങ്ങളും റിപ്പോർട്ട് ചെയ്തിട്ടുണ്ട്. നിലവിൽ 113 പേർ രോഗലക്ഷണങ്ങളോടെ നിരീക്ഷണത്തിലാണ്.
കോഴിക്കോട് ജില്ലയിലാണ് രോഗവ്യാപനം കൂടുതൽ രൂക്ഷമാകുന്നത്. ഒക്ടോബറിലെ ആദ്യ ഒമ്പത് ദിവസങ്ങളിൽ മാത്രം ജില്ലയിൽ 10 കേസുകൾ റിപ്പോർട്ട് ചെയ്തിട്ടുണ്ട്. പ്രദേശത്തെ ഒരു ക്ഷേത്രോത്സവത്തിൽ പങ്കെടുത്ത ആളുകളിലാണ് പ്രധാനമായും രോഗബാധ കണ്ടെത്തിയത്.
എന്താണ് ഷിഗെല്ല? രോഗലക്ഷണങ്ങളും പകരണ രീതികളും:
ഷിഗെല്ല ബാക്ടീരിയ മൂലമുണ്ടാകുന്ന ഗുരുതരമായ കുടൽ അണുബാധയാണ് ഷിഗെല്ലോസിസ്. ദഹനവ്യവസ്ഥയെ ദോഷകരമായി ബാധിക്കുന്ന ഈ രോഗം വളരെ പെട്ടെന്ന് മറ്റുള്ളവരിലേക്ക് പകരാൻ സാധ്യതയുള്ളതാണ്. വയറിളക്കം, രക്തം കലർന്ന മലം, കഠിനമായ വയറുവേദന, പനി എന്നിവയാണ് പ്രധാന ലക്ഷണങ്ങൾ.
ഫീക്കൽ-ഓറൽ പാതയിലൂടെയാണ് ഈ രോഗാണു പ്രധാനമായും ശരീരത്തിലെത്തുന്നത്. ശുചിത്വമില്ലാത്തതും ശരിയായി ക്ലോറിനേറ്റ് ചെയ്യാത്തതുമായ കുടിവെള്ളത്തിലൂടെയും മലിനമായ ഭക്ഷണത്തിലൂടെയുമാണ് ബാക്ടീരിയ ഉള്ളിൽ കടക്കുന്നത്. രോഗബാധിതരുമായി അടുത്ത സമ്പർക്കം പുലർത്തുന്നവരിലേക്കും വ്യക്തിശുചിത്വം പാലിക്കാത്തവരിലേക്കും രോഗം വേഗത്തിൽ പടരും. ഈച്ചകൾ വഴിയും ആഹാരസാധനങ്ങളിൽ ബാക്ടീരിയ കലരാൻ സാധ്യതയുണ്ട്. ശുചിത്വം കർശനമായി പാലിക്കണമെന്നും തിളപ്പിച്ചാറ്റിയ വെള്ളം മാത്രം കുടിക്കണമെന്നും ആരോഗ്യവകുപ്പ് നിർദേശിച്ചു.
