തിരുവനന്തപുരം: സംസ്ഥാനത്തെ പരിസ്ഥിതി ലോല പ്രദേശങ്ങളുടെ (Eco-Sensitive Zones) അന്തിമ പട്ടികയും ഭൂപടവും സർക്കാർ പുറത്തുവിട്ടു. പരിസ്ഥിതി ഡയറക്ടറേറ്റിന്റെ ഔദ്യോഗിക വെബ്‌സൈറ്റിലാണ് ഇതുസംബന്ധിച്ച മാപ്പ് പ്രസിദ്ധീകരിച്ചത്. സംസ്ഥാനത്തെ 33 വില്ലേജുകളിലായി ആകെ 8596.69 ചതുരശ്ര കിലോമീറ്റർ പ്രദേശമാണ് പരിസ്ഥിതി ലോല മേഖലയായി അടയാളപ്പെടുത്തിയിരിക്കുന്നത്.
നേരത്തെ കരട് വിജ്ഞാപനം വന്നപ്പോൾ മലയോര മേഖലകളിൽ ശക്തമായ പ്രതിഷേധവും ആശങ്കയും ഉയർന്നുവന്നിരുന്നു. ഇതിന് പരിഹാരമെന്ന നിലയിലാണ് കൃത്യമായ ഭൂപടം പ്രസിദ്ധീകരിക്കാൻ സർക്കാർ തയ്യാറായത്. കേരളം കേന്ദ്ര സർക്കാരിന് സമർപ്പിച്ച ശുപാർശയിൽ ജനവാസ മേഖലകളെയും കാർഷിക ഭൂമിയെയും പൂർണ്ണമായും ഒഴിവാക്കിയിരുന്നു. ഈ മാറ്റങ്ങൾ ഉൾപ്പെടുത്തിയുള്ള മാപ്പാണ് ഇപ്പോൾ പൊതുജനങ്ങൾക്ക് പരിശോധിക്കാനായി ലഭ്യമാക്കിയിട്ടുള്ളത്.
ഈ നിർദ്ദേശം കേന്ദ്ര പരിസ്ഥിതി മന്ത്രാലയം അംഗീകരിക്കുമെന്ന പ്രതീക്ഷയിലാണ് സംസ്ഥാന സർക്കാർ. പുതിയ ഭൂപടം പ്രസിദ്ധീകരിച്ചതോടെ സ്വന്തം പ്രദേശം ഇതിൽ ഉൾപ്പെട്ടിട്ടുണ്ടോയെന്ന് ജനങ്ങൾക്ക് നേരിട്ട് പരിശോധിക്കാനും ഇതുവഴി നിലനിൽക്കുന്ന ആശങ്കകൾ പരിഹരിക്കാനും സാധിക്കുമെന്ന് അധികൃതർ വ്യക്തമാക്കി.
