കൊച്ചി: കനത്ത മഴ പെയ്യുന്നതിനിടെ അർദ്ധരാത്രിയിൽ ആഴമുള്ള തോട്ടിൽ നിന്ന് പ്രകാശം ഉയർന്നത് നാട്ടുകാരെ പരിഭ്രാന്തിയിലാക്കി. എറണാകുളം ജില്ലയിലെ പിറവം പാലച്ചുവടാണ് സംഭവം. ഒടുവിൽ ഫയർഫോഴ്സ് തോട്ടിൽ മുങ്ങി നടത്തിയ തെരച്ചിലിൽ സത്യാവസ്ഥ പുറത്തുവന്നതോടെയാണ് നാട്ടുകാരുടെ ഭീതി മാറിയത്.
പുലർച്ചെ 12.15-ഓടെയാണ് പാലച്ചുവട് ആനിത്തോട്ടിൽ വെള്ളത്തിനടിയിൽ നിന്ന് തുരുതുരാ വിചിത്രമായ വെളിച്ചം അടിക്കുന്നത് നാട്ടുകാരുടെ ശ്രദ്ധയിൽപ്പെട്ടത്. ഏതെങ്കിലും സ്കൂട്ടറോ മറ്റ് വാഹനങ്ങളോ അപകടത്തിൽപ്പെട്ട് തോട്ടിലേക്ക് മറിഞ്ഞതാകാം എന്ന സംശയത്തിൽ നാട്ടുകാർ ഉടൻ തന്നെ ഫയർഫോഴ്സിനെ വിവരമറിയിക്കുകയായിരുന്നു.
വിവരമറിഞ്ഞ ഉടൻ പിറവം ഫയർഫോഴ്സ് സംഘവും നിരവധി നാട്ടുകാരും സ്ഥലത്തെത്തി. മഴയിൽ തോട് കവിഞ്ഞൊഴുകുന്നതിനാലും ആഴവും ശക്തമായ ഒഴുക്കും ഉള്ളതിനാലും ആർക്കും വെള്ളത്തിലേക്ക് ഇറങ്ങാൻ കഴിഞ്ഞില്ല. തുടർന്ന് അഗ്നിരക്ഷാസേനാംഗങ്ങൾ തോട്ടിലിറങ്ങി നടത്തിയ പരിശോധനയിലാണ് വെള്ളത്തിനടിയിൽ കിടക്കുന്ന 'റീചാർജബിൾ എൽ.ഇ.ഡി ലൈറ്റ്' (LED Bulb) കണ്ടെടുത്തത്.
വെള്ളം കയറിയപ്പോൾ ഉപയോഗശൂന്യമായി ആരെങ്കിലും തോട്ടിലേക്ക് എറിഞ്ഞതോ അല്ലെങ്കിൽ ഒഴുകിയെത്തിയതോ ആയ എമർജൻസി ബൾബിലെ ബാറ്ററിയും സർക്യൂട്ടും വെള്ളത്തിൽ കിടന്ന് ഷോർട്ട് ആയതാണ് തുടർച്ചയായ മിന്നൽ വെളിച്ചത്തിന് കാരണമായതെന്ന് ഫയർഫോഴ്സ് വ്യക്തമാക്കി. വെളിച്ചത്തിന് പിന്നിലെ കാരണം എൽ.ഇ.ഡി ബൾബാണെന്ന് ഉറപ്പായതോടെയാണ് ആശങ്കയിലായ നാട്ടുകാർക്ക് ആശ്വാസമായത്.
