കണ്ണൂർ: ഗാർഹിക എൽ.പി.ജി (LPG) സിലിണ്ടറുകളുടെ സബ്‌സിഡി തുടർന്നും ലഭിക്കുന്നതിനായി ഉപഭോക്താക്കൾ ഓഗസ്റ്റ് 16-നകം ഇ-കെവൈസി (e-KYC) പൂർത്തിയാക്കണം. നിശ്ചിത സമയപരിധിക്കുള്ളിൽ നടപടികൾ പൂർത്തിയാക്കാത്ത ഉപഭോക്താക്കൾക്ക് സബ്‌സിഡി ആനുകൂല്യങ്ങൾ നഷ്ടപ്പെടാനും സിലിണ്ടറുകൾ വാണിജ്യ നിരക്കിൽ വാങ്ങേണ്ടിവരാനും സാധ്യതയുണ്ട്.
ഗ്യാസ് ഏജൻസികളിൽ നേരിട്ട് പോകാതെ ഉപഭോക്താക്കൾക്ക് മൊബൈൽ ആപ്പ് വഴി വീട്ടിലിരുന്ന് തന്നെ ഇ-കെവൈസി പൂർത്തിയാക്കാം.
മൊബൈൽ ആപ്പ് വഴി ഇ-കെവൈസി ചെയ്യുന്ന വിധം:
* ആപ്പ് ഡൗൺലോഡ് ചെയ്യുക: അതത് ഗ്യാസ് കമ്പനികളുടെ (Indane / Bharat Gas / HP Gas) ഔദ്യോഗിക ആപ്പ് ഫോണിൽ ഇൻസ്റ്റാൾ ചെയ്യുക.
* ലോഗിൻ ചെയ്യുക: എൽ.പി.ജിയുമായി ബന്ധിപ്പിച്ച മൊബൈൽ നമ്പറും ലഭിക്കുന്ന ഒ.ടി.പിയും (OTP) നൽകി ലോഗിൻ ചെയ്യുക.
* അക്കൗണ്ട് ലിങ്ക് ചെയ്യുക: ഇൻഡേൻ ഉപഭോക്താക്കൾ 16 അക്ക എൽ.പി.ജി ഐഡി നൽകി അക്കൗണ്ട് ബന്ധിപ്പിക്കണം. ഭാരത്, എച്ച്.പി ആപ്പുകളിൽ ഇത് നേരിട്ട് ലഭിക്കും.
* ഇ-കെവൈസി തിരഞ്ഞെടുക്കുക: ഇൻഡേനിൽ 'My Profile' വിഭാഗത്തിലും, ഭാരത് ഗ്യാസിൽ ഹോംപേജിലും, എച്ച്.പിയിൽ 'LPG Section'-ലും ഇ-കെവൈസി ഓപ്ഷൻ കാണാം.
* ഫെയ്സ് സ്കാനിങ്: നിബന്ധനകൾ അംഗീകരിച്ച ശേഷം 'AadhaarFaceRD' ആപ്പ് ഉപയോഗിച്ച് മുഖം സ്കാൻ ചെയ്ത് ഇ-കെവൈസി പൂർത്തിയാക്കാം.
ആപ്പ് വഴി സാധിക്കാത്തവർക്ക് ഗ്യാസ് വിതരണത്തിനെത്തുന്ന ജീവനക്കാർ വഴിയോ ഏജൻസി ഓഫീസുകളിൽ നേരിട്ടെത്തിയോ ഇ-കെവൈസി ചെയ്യാവുന്നതാണ്.
