ഫിഫ ലോകകപ്പ് പോരാട്ടങ്ങളിൽ ഇരട്ട ഗോളുകളോടെ തിളങ്ങി ലയണൽ മെസിയും കിലിയൻ എംബാപ്പെയും ചരിത്ര നേട്ടങ്ങൾ സ്വന്തമാക്കിയപ്പോൾ അർജന്റീനയ്ക്കും ഫ്രാൻസിനും തകർപ്പൻ ജയം. ഓസ്ട്രിയയെ തകർത്ത നിലവിലെ ചാമ്പ്യന്മാരായ അർജന്റീനയും, ഇറാഖിനെ കീഴടക്കിയ ഫ്രാൻസും ടൂർണമെന്റിന്റെ നോക്കൗട്ട് ഘട്ടത്തിലേക്ക് യോഗ്യത നേടി.
ഡാലസിൽ നടന്ന മത്സരത്തിൽ ഓസ്ട്രിയയെ എതിരില്ലാത്ത രണ്ട് ഗോളുകൾക്കാണ് അർജന്റീന തകർത്തത്. ഒൻപതാം മിനിറ്റിൽ പെനാൽറ്റി പാഴാക്കിയ ക്യാപ്റ്റൻ ലയണൽ മെസി ഇരട്ട ഗോളുകളോടെയാണ് ഇതിന് പ്രായശ്ചിത്തം ചെയ്തത്. മത്സരത്തിന്റെ 38-ാം മിനിറ്റിൽ മനോഹരമായൊരു ലോങ് റേഞ്ചറിലൂടെ മെസി അർജന്റീനയ്ക്ക് ലീഡ് സമ്മാനിച്ചു. ഈ ഗോളോടെ 16 ഗോളുകളെന്ന ജർമൻ ഇതിഹാസം മിറോസ്ലാവ് ക്ലോസെയുടെ റെക്കോർഡ് മറികടന്ന് ലോകകപ്പിൽ ഏറ്റവും കൂടുതൽ ഗോൾ നേടുന്ന താരമെന്ന ചരിത്ര നേട്ടം മെസി സ്വന്തം പേരിലാക്കി. തുടർന്ന് മത്സരത്തിന്റെ ഇഞ്ചുറി ടൈമിൽ (90+5 മിനിറ്റ്) മൂന്ന് പ്രതിരോധ താരങ്ങൾക്കിടയിലൂടെ പന്ത് വലയിലെത്തിച്ച് മെസി ടീമിന്റെ വിജയമുറപ്പിക്കുകയും തന്റെ ലോകകപ്പ് ഗോൾ നേട്ടം 18 ആയി ഉയർത്തുകയും ചെയ്തു. രണ്ടു മത്സരങ്ങളിൽ നിന്ന് 5 ഗോളുകൾ നേടിയ മെസിയുടെ മികവിലാണ് അർജന്റീന നോക്കൗട്ടിൽ കടന്നത്.
മറ്റൊരു മത്സരത്തിൽ ഫിലാഡാൽഫിയയിൽ കനത്ത മഴയും ഇടിമിന്നലും കാരണം രണ്ട് മണിക്കൂറോളം തടസപ്പെട്ട പോരാട്ടത്തിൽ ഇറാഖിനെ മറുപടിയില്ലാത്ത മൂന്ന് ഗോളുകൾക്കാണ് ഫ്രാൻസ് തകർത്തത്. ഫ്രഞ്ച് പടയ്ക്കായി നായകൻ കിലിയൻ എംബാപ്പെ ഇരട്ട ഗോളുകൾ നേടി മുന്നിൽ നിന്ന് നയിച്ചു. കളിയുടെ 14, 54 മിനിറ്റുകളിലായിരുന്നു എംബാപ്പെയുടെ ഗോളുകൾ. 14-ാം മിനിറ്റിലെ ആദ്യ ഗോളോടെ ലോകകപ്പിൽ 15 ഗോളുകൾ തികച്ച എംബാപ്പെ ബ്രസീലിയൻ ഇതിഹാസം റൊണാൾഡോയ്ക്കൊപ്പമെത്തി. 54-ാം മിനിറ്റിൽ ഇറാഖ് പ്രതിരോധത്തിലെ പിഴവ് മുതലെടുത്ത് താരം രണ്ടാം ഗോളും നേടി മിറോസ്ലാവ് ക്ലോസെയുടെ റെക്കോർഡിനൊപ്പമെത്തി. 66-ാം മിനിറ്റിൽ ഒസ്മാൻ ഡെംബലെയാണ് ഫ്രാൻസിന്റെ മൂന്നാം ഗോൾ നേടിയത്. ലോകകപ്പിലെ ഏറ്റവും കൂടുതൽ ഗോളുകളുടെ റെക്കോർഡിൽ മെസി നിലവിൽ എംബാപ്പെയേക്കാൾ രണ്ട് ഗോളുകൾക്ക് മുന്നിലാണ്. ഇതോടെ ഈ ലോകകപ്പിൽ റെക്കോർഡ് നേട്ടത്തിനായി ഇരു താരങ്ങളും തമ്മിലുള്ള പോരാട്ടം കൂടുതൽ ആവേശകരമായി മാറിയിരിക്കുകയാണ്.
