"മുഖ്യമന്ത്രി കസേര ബെഞ്ചായി മാറി"; യുഡിഎഫിലെ തർക്കത്തിൽ സമൂഹമാധ്യമങ്ങളിൽ ട്രോൾ മഴ, ലീഗ് നിലപാട് നിർണായകമാകുന്നു

 

തിരുവനന്തപുരം: നിയമസഭാ തിരഞ്ഞെടുപ്പിലെ യുഡിഎഫിന്റെ ചരിത്ര വിജയത്തിന് പിന്നാലെ മുഖ്യമന്ത്രിയെ നിശ്ചയിക്കുന്നതിലെ അനിശ്ചിതത്വം തുടരുന്നു. മൂന്ന് കോൺഗ്രസ് നേതാക്കൾക്കിടയിലെ തർക്കം നീളുന്നതോടെ സമൂഹ മാധ്യമങ്ങളിൽ പരിഹാസ രൂപേണയുള്ള ട്രോളുകൾ നിറയുകയാണ്. മുഖ്യമന്ത്രിയുടെ കസേരയ്ക്ക് പകരം ഒന്നിലധികം ആളുകൾക്ക് ഇരിക്കാവുന്ന ബെഞ്ച് മതിയെന്ന രീതിയിലുള്ള ചിത്രങ്ങളാണ് വ്യാപകമായി പ്രചരിക്കുന്നത്. ഇതര സംസ്ഥാന തൊഴിലാളികൾ പോലും മുഖ്യമന്ത്രിയില്ലാത്ത ഭരണമെന്ന് കേരളത്തെ പരിഹസിക്കുന്നു എന്ന തരത്തിലുള്ള മീമുകളും വൈറലായി കഴിഞ്ഞു. ഇംഗ്ലീഷ് മാധ്യമങ്ങൾ ഉൾപ്പെടെ ഈ രാഷ്ട്രീയ സാഹചര്യം റിപ്പോർട്ട് ചെയ്തിട്ടുണ്ട്.

അതേസമയം മുഖ്യമന്ത്രിയെ പ്രഖ്യാപിക്കുന്നത് വൈകുന്നതിൽ മുന്നണിയിലെ പ്രധാന ഘടകകക്ഷിയായ മുസ്ലിം ലീഗ് ശക്തമായ പ്രതിഷേധത്തിലാണ്. അടിയന്തര തീരുമാനത്തിനായി ലീഗ് നേതൃത്വം ഇന്ന് പാണക്കാട് യോഗം ചേരുന്നുണ്ട്. കോൺഗ്രസ് അധ്യക്ഷ സോണിയ ഗാന്ധി പാണക്കാട് സയ്യിദ് സാദിഖലി ശിഹാബ് തങ്ങളെ നേരിട്ട് ഫോണിൽ വിളിച്ച് ചർച്ച നടത്തി. സംസ്ഥാനത്തെ രാഷ്ട്രീയ സാഹചര്യങ്ങളും ഘടകകക്ഷികളുടെ താല്പര്യങ്ങളും സോണിയ ഗാന്ധി ചോദിച്ചറിഞ്ഞു. മുഖ്യമന്ത്രി സ്ഥാനത്തേക്ക് വിഡി സതീശനെ പിന്തുണയ്ക്കുന്ന നിലപാടാണ് ലീഗ് സ്വീകരിച്ചിരിക്കുന്നത്. സതീശൻ മുഖ്യമന്ത്രിയാകുന്നതിനോടുള്ള താല്പര്യം സാദിഖലി തങ്ങൾ ഹൈക്കമാൻഡിനെ അറിയിച്ചു.

ഹൈക്കമാൻഡ് തീരുമാനം പ്രഖ്യാപിക്കുന്നതിൽ മുതിർന്ന നേതാവ് എകെ ആന്റണിയുടെ അഭിപ്രായവും നിർണായകമാകും. ആന്റണിയുമായി സോണിയ ഗാന്ധി ഇതിനോടകം തന്നെ ആശയവിനിമയം നടത്തിയിട്ടുണ്ട്. എംഎൽഎമാരുടെ പിന്തുണയും ഘടകകക്ഷികളുടെ നിലപാടും പരിഗണിക്കുമ്പോൾ വിഡി സതീശന് സാധ്യതയേറുന്നുണ്ടെങ്കിലും അന്തിമ തീരുമാനം ഡൽഹിയിൽ നിന്നുണ്ടാകാൻ വൈകുകയാണ്. മുഖ്യമന്ത്രിയെ പ്രഖ്യാപിച്ചാലുടൻ മന്ത്രിസഭാ രൂപീകരണ ചർച്ചകളിലേക്ക് കടക്കാനാണ് മുന്നണിയുടെ നീക്കം.