കണ്ണൂർ: പാലക്കാട് ഡിവിഷന്റെ വിവിധ ഭാഗങ്ങളിൽ റെയിൽവേ ട്രാക്ക് അറ്റകുറ്റപ്പണികൾ നടക്കുന്നതിനാൽ ജനുവരി, ഫെബ്രുവരി മാസങ്ങളിലെ പ്രധാന ട്രെയിൻ സർവീസുകൾക്ക് നിയന്ത്രണം ഏർപ്പെടുത്തി. കണ്ണൂർ, കോഴിക്കോട്, പാലക്കാട് ഭാഗങ്ങളിലൂടെയുള്ള യാത്രക്കാരെ ഈ മാറ്റം ബാധിക്കും.
ഭാഗികമായി റദ്ദാക്കിയ ട്രെയിനുകൾ:
* ആലപ്പുഴ - കണ്ണൂർ എക്സ്പ്രസ് (16307): ജനുവരി 7, 14, 21, 28, ഫെബ്രുവരി 4 തീയതികളിൽ ഈ ട്രെയിൻ കോഴിക്കോട് വരെ മാത്രമേ സർവീസ് നടത്തൂ. കോഴിക്കോട് മുതൽ കണ്ണൂർ വരെയുള്ള ഭാഗം റദ്ദാക്കി.
* തിരുവനന്തപുരം - കണ്ണൂർ ജനശതാബ്ദി (12082): ജനുവരി 7, 14, 21, 28, ഫെബ്രുവരി 4 തീയതികളിൽ തിരുവനന്തപുരത്ത് നിന്നുള്ള സർവീസ് കോഴിക്കോട് അവസാനിക്കും. കോഴിക്കോട് - കണ്ണൂർ യാത്ര ഭാഗികമായി റദ്ദാക്കി.
* കോയമ്പത്തൂർ - ഷൊർണൂർ പാസഞ്ചർ (56603): ജനുവരി 21-ന് ഈ ട്രെയിൻ പാലക്കാട് ജങ്ഷനിൽ സർവീസ് അവസാനിപ്പിക്കും. പാലക്കാട് - ഷൊർണൂർ ഭാഗം റദ്ദാക്കി.
സർവീസ് ആരംഭിക്കുന്ന സ്ഥലത്തിൽ മാറ്റം വരുത്തിയവ:
* പാലക്കാട് - നിലമ്പൂർ റോഡ് പാസഞ്ചർ (56607): ജനുവരി 11, 18, 26, 27 തീയതികളിൽ പാലക്കാടിന് പകരം ലക്കിടിയിൽ നിന്ന് രാവിലെ 6.32-ന് യാത്ര ആരംഭിക്കും.
* പാലക്കാട് - എറണാകുളം മെമു (66609): ജനുവരി 26-ന് പാലക്കാടിന് പകരം ഒറ്റപ്പാലത്ത് നിന്ന് രാവിലെ 7.57-ന് യാത്ര ആരംഭിക്കും. പാലക്കാട് - ഒറ്റപ്പാലം ഭാഗത്തെ സർവീസ് ഉണ്ടായിരിക്കില്ല.
അറ്റകുറ്റപ്പണികൾ വേഗത്തിൽ പൂർത്തിയാക്കി സർവീസുകൾ പുനഃസ്ഥാപിക്കുമെന്ന് റെയിൽവേ അധികൃതർ അറിയിച്ചു. യാത്രക്കാർ സമയക്രമത്തിലെ മാറ്റം ശ്രദ്ധിക്കണമെന്ന് റെയിൽവേ അഭ്യർത്ഥിച്ചു.
