ന്യൂഡൽഹി: രാജ്യത്തെ റെയിൽവേ യാത്രാനിരക്കുകളിൽ വരുത്തിയ വർധന നാളെ മുതൽ പ്രാബല്യത്തിൽ വരും. സാധാരണക്കാരായ യാത്രക്കാരെ കാര്യമായി ബാധിക്കാത്ത വിധത്തിൽ സബർബൻ ട്രെയിനുകളെ വർധനവിൽ നിന്ന് ഒഴിവാക്കിയിട്ടുണ്ടെങ്കിലും ദീർഘദൂര യാത്രക്കാർ അധിക തുക നൽകേണ്ടി വരും.
നിരക്ക് വർധന ഇങ്ങനെ:
* ഓർഡിനറി ക്ലാസുകൾ: കിലോമീറ്ററിന് 1 പൈസ.
* മെയിൽ/എക്സ്പ്രസ് (നോൺ എസി): കിലോമീറ്ററിന് 2 പൈസ.
* എസി ക്ലാസുകൾ: കിലോമീറ്ററിന് 2 പൈസ.
215 കിലോമീറ്റർ വരെയുള്ള യാത്രകൾക്ക് നിരക്ക് വർധന ബാധകമല്ല. ഏകദേശം 500 കിലോമീറ്റർ ദൂരമുള്ള നോൺ-എസി യാത്രയ്ക്ക് 10 രൂപയും, മെയിൽ/എക്സ്പ്രസ് ട്രെയിനുകളിലെ യാത്രയ്ക്ക് 20 രൂപയും അധികമായി നൽകണം.
എന്തുകൊണ്ട് ഈ വർധന?
റെയിൽവേയുടെ പ്രവർത്തനച്ചെലവിലുണ്ടായ വൻ വർധനവാണ് ഈ തീരുമാനത്തിന് പിന്നിൽ. നിലവിൽ 2,63,000 കോടി രൂപയാണ് റെയിൽവേയുടെ ആകെ പ്രവർത്തനച്ചെലവ്. ഇതിൽ വലിയൊരു ഭാഗം ശമ്പളത്തിനും (1,15,000 കോടി), പെൻഷനുമായി (60,000 കോടി) മാറ്റിവെക്കേണ്ടി വരുന്നു. ഈ സാമ്പത്തിക പ്രതിസന്ധി മറികടക്കാനാണ് നിരക്ക് പരിഷ്കരണമെന്ന് റെയിൽവേ വ്യക്തമാക്കി. ഈ മാറ്റത്തിലൂടെ 600 കോടി രൂപയുടെ അധിക വരുമാനമാണ് റെയിൽവേ ലക്ഷ്യമിടുന്നത്.
