പഴയങ്ങാടി: ചെറുകുന്ന് ടൗണില്‍ വ്യാപാര സ്ഥാപനങ്ങളില്‍ തീപിടിത്തം. ഇന്നു പുലർച്ചെ ആറോടെയാണ് തീപിടിത്തം ഉണ്ടായത്.
ചെറുകുന്നിലെ എറമുള്ളാൻ റഷീദ ആയുർവേദ മെഡിക്കല്‍സ്, പിവിഎച്ച്‌ സണ്‍സ് സൂപ്പർ മാർക്കറ്റ്, കെ. ഹംസ ഹാർഡ്‌വെയേഴ്സ് എന്നീ സ്ഥാപനങ്ങളുടെ മുകളിലത്തെ നിലയിലാണ് തീ പടർന്നത്.
കടകളുടെ രണ്ടാം നിലയില്‍നിന്ന് പുകയും തീയും ഉയരുന്നത് കണ്ട് നാട്ടുകാർ പോലീസില്‍ വിവരം അറിയിക്കുകയായിരുന്നു. കണ്ണൂരില്‍ നിന്നെത്തിയ രണ്ട് യൂണിറ്റ് ഫയർഫോഴ്സ് സംഘം രണ്ടു മണിക്കൂർ സമയം എടുത്താണ് തീ നിയന്ത്രണ വിധേയമാക്കിയത്.
ഇരു സ്ഥാപനങ്ങളിലും സാധനങ്ങള്‍ സൂക്ഷിക്കുന്ന ഇടത്താണ് തീപിടിച്ചത്. വ്യാപാര സ്ഥാപനങ്ങളിലെ താഴത്തെ നിലയിലേക്ക് തീ പടരാതിരുന്നതിനാല്‍ വലിയ തോതില്‍ നാശനഷ്ടം ഉണ്ടായില്ല.
