മലപ്പുറം: പെരിന്തല്മണ്ണയില് സ്കൂട്ടറില് പോകുകയായിരുന്ന ജ്വല്ലറി ഉടമയെ ആക്രമിച്ച് രണ്ടു കോടിയോളം വില വരുന്ന സ്വർണ്ണം കവർന്ന കേസില് 4 പേർ പിടിയില്.
കണ്ണൂർ സ്വദേശികളായ പ്രബിൻലാല്, ലിജിൻ രാജൻ, തൃശ്ശൂർ വരന്തരപ്പള്ളി സ്വദേശികളായ സതീശൻ, നിഖില് എന്നിവരാണ് കസ്റ്റഡിയിലുള്ളത്. ഇവരെ തൃശൂർ ഈസ്റ്റ് പൊലീസ് ചോദ്യം ചെയ്തുവരികയാണ്. എന്നാല് ഇവരുടെ കൈവശത്തു നിന്നും സ്വർണം കണ്ടു കിട്ടിയിട്ടില്ല. അഞ്ച് പേർ കൂടി സംഘത്തിലുണ്ടെന്നാണ് പോലീസ് നല്കുന്ന വിവരം.
സ്കൂട്ടറില് പോകുകയായിരുന്ന എം കെ ജ്വല്ലറി ഉടമ യൂസഫിനെയും സഹോദരൻ ഷാനവാസിനെയും പിന്തുടർന്നാണ് കാറിലുളള സംഘം സ്വർണ്ണം കവർന്നത്. രാത്രി 9 മണിയോടെയാണ് സംഭവമുണ്ടായത്. ജ്വല്ലറി മുതല് തന്നെ കാർ പിന്തുടരുന്നുണ്ടായിരുന്നുവെന്ന് സിസിടിവി ദൃശ്യങ്ങളില് നിന്നും വ്യക്തമാണ്.
ജൂവലറി ബില്ഡിങ് ഓടിട്ട കെട്ടിടത്തിലായതിനാല് ആഭരണണങ്ങള് കടയില് സൂക്ഷിക്കാതെ രാത്രി ഉടമയുടെ വീട്ടിലേക്ക് ബാഗിലാക്കി കൊണ്ടുപോകുകയാണ് പതിവ്. ആസൂത്രിതമായാണ് കൃത്യം നടത്തിയതെന്ന് പോലീസ് പറഞ്ഞു.
