കേരളം: കേരളത്തിലെ ഡ്രൈവിംഗ് ടെസ്റ്റ് നടപടികളിൽ വലിയ മാറ്റങ്ങൾ വരുന്നു. പരിഷ്കാരങ്ങൾ കർശനമായി നടപ്പാക്കിയതോടെ ഡ്രൈവിംഗ് ടെസ്റ്റിലെ വിജയശതമാനം 100-ൽ നിന്ന് 40-45 ശതമാനമായി കുറഞ്ഞു. ഈ സാഹചര്യത്തിൽ, ഗതാഗത വകുപ്പ് നടത്തുന്ന ടെസ്റ്റുകളുടെ എണ്ണം വർധിപ്പിക്കാൻ തീരുമാനിച്ചിരിക്കുകയാണ്. ഗതാഗത മന്ത്രിയുടെ നേതൃത്വത്തിൽ ചേർന്ന യോഗത്തിലാണ് ഈ തീരുമാനം കൈക്കൊണ്ടത്.
പുതുക്കിയ വ്യവസ്ഥ പ്രകാരം, ഒരു ആർടി ഓഫീസിൽ രണ്ട് ഓഫീസർമാരുടെ കീഴിൽ നടത്തുന്ന ടെസ്റ്റുകളുടെ എണ്ണം 80-ൽ നിന്ന് 100 ആയി ഉയർത്തും. പരിഷ്കാരത്തിന് മുമ്പ് കേരളത്തിലെ 17 ആർടി ഓഫീസുകളിലും 69 ജോയിന്റ് ആർടി ഓഫീസുകളിലും 8000 പേർ പങ്കെടുത്തിരുന്നെങ്കിൽ, ഇപ്പോൾ അത് 6000 ആയി കുറഞ്ഞിരിക്കുന്നു. ജോയിന്റ് ആർടി ഓഫീസുകളിൽ നിലവിൽ 40 ടെസ്റ്റുകളാണ് നടത്തുന്നത്, ഇതും വർധിപ്പിക്കാൻ നിർദ്ദേശമുണ്ട്
ലേണേഴ്സ് ടെസ്റ്റിന്റെ എണ്ണം വർധിപ്പിക്കാനും വകുപ്പ് തീരുമാനമെടുത്തിട്ടുണ്ട്. കൂടാതെ, ഡ്രൈവിങ് സ്കൂളുകളിൽ കൂടുതൽ അനുഭവസമ്പത്തുള്ള ഇൻസ്ട്രക്ടർമാരെ നിയമിക്കാനുള്ള നിർദ്ദേശത്തിന്റെ ഭാഗമായി കൂട്ട നിയമനം നടത്താനും തീരുമാനമായിട്ടുണ്ട്. ഈ മാറ്റങ്ങൾ പുതിയതായി ലൈസൻസ് എടുക്കുന്നവർക്കും രണ്ടാമത് ടെസ്റ്റിനായി അപേക്ഷിക്കുന്നവർക്കും ഗുണകരമാകുമെന്ന് പ്രതീക്ഷിക്കുന്നു.
